“Əminliklə deyə bilərəm ki, onlar sürət həddini aşmаmışdı”
Portuqaliyalı futbolçu qardaşların - Dioqo Jota ilə Andre Silvanın həyatını itirdiyi yanan "Lamborcini" ilə bağlı videonun müəllifi olduğunu iddia edən yük maşını sürücüsü Joze Azevedu ətraflı məlumat paylaşıb.
"Football-plus.az" xəbər verir ki, onun sözlərini Portuqaliyanın məşhur "Record" nəşri təqdim edib:
"Mən video çəkirdim və kömək etmək üçün dayandım, amma təəssüf ki, heç nə edə bilmədim. Vicdanım təmizdi. O gecə nələr çəkdiyimi bilirəm. Açığını deyim ki, maşında kimlərin olduğunu bilmirdim. Ailələrinə başsağlığı verirəm. Əminliklə deyə bilərəm ki, onlar sürət həddini aşmаmışdı. Maşının markasını və rəngini görə bildim. Bu yoldan hər gün – bazar ertəsindən şənbəyə qədər keçirəm və bilirəm ki, yol çox pis vəziyyətdədi. Qaranlıq yoldu, amma maşının markasını və rəngini seçmək mümkün idi. Təəssüf ki, belə hadisə baş verdi”.
Həmçinin Azevedunun hadisə yerində yanğınsöndürən balondan istifadə edərək futbolçulara kömək olmağa çalışdığı bildirilir. Xatırladaq ki, futbolçular İspaniyanın şimal-qərbində baş verən avtomobil qəzasında həlak olub. Dioqonun idarə etdiyi "Lamborcini" ötmə zamanı təkəri partlayandan sonra yoldan çıxaraq alışıb.
“Liverpul”un hücumçusu Jota və “Penafyel”də çıxış edən qardaşı Andre Silva iyulun 5-də Portuqaliyada dəfn olunub.
Digər xəbərlər
