''Qalatasaray''ın Leroy Saneni heyətinə qatması və bu yayın ilk transfer bombasını partlatmasının ardından diqqətlər ''Fənərbaxça''ya yönəlib.

"Football-plus.az" xəbər verir ki, ''sarı-lacivərdlilər'' Joze Mourinyonun tələbi ilə sürətli bir cinah oyunçusu transfer etmək istəyirlər.

Türkiyə mətbuatının iddiasına görə ''Fənər'' diqqətini ''Tottenhem''in ulduzu Son Hın Minə yönəldib. Təcrübəli futbolçu ötən mövsümün gedişində müqaviləni birillik yeniləsə də, start heyətinə düşməkdə çətinlik çəkdiyi üçün London klubundan ayrılmaq istəyir. Amma dünyanın dörd bir tərəfində ona maraq göstərən klublar heç də az deyil. Bu üzdən İstanbul nəhənginin işi heç də asan olmayacaq.

''Fənər'' rəsmiləri Sonun transfer şərtləri ilə maraqlanırlar. Amma transferin kluba neçəyə başa gələ biləcəyi barədə məlumat verilmir. İddialara görə 32 yaşlı futbolçu Səudiyyə Ərəbistanı və vətənindən gələn təkliflərin hamısını geri çevirib. Çünki karyerasını Avropada davam etdirmək arzusundadı. Belə olan halda ''Fənər''in əsas rəqibi Dortmund ''Borussiya''sıdı. Bu klub, eləcə də ''Reyncers'' Sonun xidmətində maraqlıdı.

Son Hın Min ötən yay da ''Fənər''in gündəminə gəlmişdi. Daha doğrusu, o, Əziz Yıldırımın hədəfində idi. Yıldırım prezident seçiləcəyi təqdirdə ilk növbədə bu oyunçunu transfer etməyə çalışacaqdı. Amma seçkilərdə bilindiyi kimi Əli Koç qalib gəldi.

Daha öncə ''Hamburq'' və ''Bayer-04''də forma geymiş Sonu artıq ''Tottenhem''in əfsanəsi də adlandırmaq olar. O, 2015-ci ildən bu klubdadı.

Koreya yığmasının kapitanı olan Son geridə qoyduğumuz mövsümdə 46 rəsmi oyuna çıxaraq aktivinə 11 qol, 12 məhsuldar ötürmə yazıb.