Roy Hocson “Kristal Pelas”dan ayrılıb. İngiltərə klubu onu bazar ertəsi axşam saatlarında işdən azad edib.

"Football-plus.az" xəbər verir ki, 76 yaşlı mütəxəssis bir neçə gün əvvəl məşq zamanı özünü pis hiss etmiş və dərhal xəstəxanaya aparılmışdı. Vəziyyəti normallaşandan sonra onun komandanı çalışdırmayacağı məlum olub. Hocson “Kristal Pelas”ı ilk dəfə 2017-ci ildə çalışdırmaq imkanı qazanmış, baş məşqçi vəzifəsində 4 il çalışmışdı. İngilis mütəxəssis 2022-ci ildə qısa müddətdə “Uotford”a başçılıq etmiş və ötən il “Kristal Pelas”a qayıtmışdı. Paytaxt komandası onun rəhbərliyi altında 200 oyuna çıxıb, 66 dəfə qalib gəlib, 46 dəfə heç-heçə edib və 88 matçda məğlub olub.

Artıq “Kristal Pelas”ın yeni baş məşqçisi müəyyənləşib. Bu vəzifəyə “Ayntraxt”ın (Frankfurt) sabiq çalışdırıcısı Oliver Qlasner təyin edilib. 49 yaşlı alman mütəxəssislə müddəti 2026-cı ilin iyununa qədər nəzərdə tutulan müqavilə imzalanıb. Əlavə edək ki, “Kristal Pelas” hazırda premyer-liqada 25 oyuna 25 xalla 15-ci yeri tutur.