UEFA yeni avrokubok mövsümünün əvvəlində çətin vəziyyətə düşüb.

"Football-plus.az" xəbər verir ki, qitə futbol qurumu İngiltərənin “Kristal Pelas” klubunun Avropa Liqasında (AL) iştirakına icazə verib-verməmək kimi seçim qarşısında qalıb.

“Daily Mail” nəşrinin məlumatına görə, “Kristal Pelas” İngiltərə kubokunu qazandıqdan sonra AL-də şıxış hüququna yiyələnsə də, komandanın bu yarışa buraxılması sual altındadı. UEFA-nın qaydalarına görə, bir sərmayədar avrokuboklarda eyni zamanda birdən çox klubun sahibi ola bilməz. “Kristal Pelas”ın sahibi isə həm də avrokuboklara vəsiqə qazanan Fransanın “Lion” klubunun da səhmlərinə malikdi. UEFA bu mürəkkəb məsələ ilə bağlı yekun qərarı iyunun 30-da verəcək.

“Daily Mail”in yazdığına görə, vacib qərarın ardınca həm klubun, həm də qərardan təsirlənən digər tərəflərin İdman Arbitraj Məhkəməsinə müraciət etmək hüququ olacaq.

Belə ki, AL-dən kənarlaşdırılma qərarından London klubunun əsas səhmdarı olan Con Tekstorun da şikayət etməsi ehtimalı çoxdu. Yox, “Kristal Pelas” turnirdə iştirak hüququ qazansa, bu qərardan “Nottingem Forest” və “Brayton” da şikayət verə bilər. Çünki “Kristal Pelas” turnirdən kənarlaşdırılarsa, bu klublardan “Nottingem Forest” AL-də mübarizəyə təsnifat deyil, birbaşa liqa mərhələsindən başlaya, “Brayton” isə Konfrans Liqasında iştirak edə bilər.