''Fənərbaxça'' yeni qapıçı transfer edib.

"Football-plus.az" xəbər verir ki, bir müddət öncə İstanbul nəhəngi 3-cü qapıçı Ərtuğrul Çətini 1-ci liqa təmsilçisi ''Erokspor''a icarəyə göndərmişdi.

Ərtuğrul Çətin ötən mövsümün sonlarına yaxın ''Hatayspor'' ilə səfər oyununda çox kobud səhvi ilə yadda qalmışdı. 3-cü qapıçı mövqeyinə Tarık Çətin transfer olunub. Daha doğrusu, bu qapıçı öz doğma klubuna qayıdıb.

28 yaşlı əlcək sahibi məhz ''Fənər''in yetirməsidi. O, 2017/18-də ''sarı-lacivərdlilər''in heyətində yer alsa da, heç bir rəsmi oyuna çıxmadan ayrılmalı olmuşdu. 2018-də icarə əsasında ''Fatih Karagümrük''ə yollandıqdan sonra o, 2019-da ''Fənər''i birdəfəlik tərk edərək ''Çaykur Rizəspor''a transfer olundu. Həmin vaxtdan bu yana məhz rizəlilərin şərəfini qoruyan Çətin bu yay sərbəst futbolçuya çevrildi və göründüyü kimi 6 ildən sonra doğma klubuna qayıtmağa üstünlük verdi. Birillik müqaviləyə imza atan Tarık komanda ilə birlikdə Portuqaliyaya toplanışa yollanacaq.

Onun ''Fənər''in ''altyapı''sında yetişməsi komandaya avrokubokların iştirak ərizəsinə əlavə bir oyunçu daxil etmək fürsəti verəcək.

Tarık Çətin ötən mövsüm ''Çaykur Rizəspor''da 15 rəsmi oyuna çıxıb. Ümumilikdə 23 qol buraxan qapıçı 2 oyunda qapısını toxunulmaz saxlayıb.