Fərqli oyunçularla danışıqlar aparmaqda davam edən ''Fənərbaxça'' yeni bir isimlə anlaşıb.

"Football-plus.az" xəbər verir ki, ''Gent''in üzvü Arçi Braun ''Fənərbaxça'' ilə ''Milan'' arasında seçim edərək İstanbul nəhənginə üstünlük verib. Bunu italiyalı insayder Di Martsio da təsdiqləyib.

Sol müdafiəçi olan 23 yaşlı futbolçu tezliklə İstanbula gələrək tibbi müayinədən keçəcək. Onunla ''4+1'' illik müqavilə imzalanacaq. Belçikalının maaşı isə 1,5 milyon avro təşkil edəcək.

Əslində bu transfer daha öncə baş tutmalı idi. Amma ''Fənərbaxça'' ilə ''Gent'' arasında 8 milyon avroluq anlaşma baş tutduqdan sonra məsələyə ''Milan'' müdaxilə etdi. İtaliya nəhəngi də Belçika təmsilçisinə eyni məbləği təklif etdi. Braun düşünmək üçün vaxt istəyərək ''Gent''in düşərgəsindən ayrılaraq Belçikaya yollandı. Hər iki klub onun qərarını gözləməyə başladı. Bu məqamda Joze Mourinyo məsələyə müdaxilə etdi. Ünlü mütəxəssis futbolçu ilə görüntülü danışaraq onu klubun hədəfləri və öz planları ilə tanış etdi. Məhz bu söhbətdən sonra Braun ''Fənər''ə keçməyə razılıq verdi.

Transfer dəyəri 7 milyon avro civarında olan Arçi Braun İngiltərədə doğulub və ''Derbi''nin yetirməsidi. İlk peşəkar müqaviləsini ''Lozanna'' ilə imzalayan solaxay futbolçu 2023-dən ''Gent''in şərəfini qoruyurdu.

O, ötən mövsüm 46 rəsmi oyunda iştirak edərək aktivinə 3 qol, 6 məhsuldar ötürmə yazıb.