“Fənərbaxça” Leonardo Bonuççinin ardından daha bir tanınmış futbolçunu heyətinə qatıb.

“Football-plus.az” xəbər verir ki, mövsümün əvvəlindən bəri “Milan”dan Rade Kruniçi transfer etməyə can atan “Fənər”, nəhayət, istəyinə çatıb. “Milan”ın ötən yay 10 milyon avro tələb etməsi üzündən bu keçid baş tutmamışdı. Bu dəfə isə İstanbul nəhəngi bosniyalını 5 milyon avroya heyətinə qatmağı bacarıb. Dünən İstanbula ayaq basan Kruniçin 3,5 illik müqaviləyə imza atacağı gözlənilir. Onun illik qazancı isə 3 milyon avro civarında olacaq. Bonuççinin transferində olduğu kimi, bu transferdə də Edin Cekonun rolu böyük oldu. Daha öncə “Donyi Srem”, “Boraç”, “Empoli”nin şərəfini qorumuş Kruniç 2019-dan “Milan”da idi. Bosniya yığmasının da şərəfini qoruyan 30 yaşlı futbolçu bu mövsüm “rossonyerlər”in heyətində 14 rəsmi oyuna çıxmışdı.