İspaniya təmsilçisi ''Las Palmas''ın kapitanı və önəmli futbolçusu Kirian Rodriges belə desək, çoxlarına örnək ola biləcək bir həyat mübarizəsi sərgiləyir.

Məsələ burasındadı ki, 29 yaşlı futbolçu uzun müddətdi, xərçəng xəstəliyindən əziyyət çəkir. Ona hələ 2022-ci ilin avqustunda qan xərçənginin bir növü olan ''Hockin limfoması'' diaqnozu qoyulmuşdu. İspaniyalı yarımmüdafiəçi həmin vaxt 6 aylıq müalicə kursu keçdikdən sonra xəstəliyə qalib gəlmiş və karyerasını bərpa etmişdi. Amma ikiillik fasilədən sonra yenə üzücü xəbər gəldi.

Fevralda onun orqanizmində yenidən residiv baş verdiyi məlum oldu. Yenidən karyerasını dayandırmaq məcburiyyətində qalan Rodirgesə hətta ''Real'' da dəstək vermişdi. Kimyaterapiyanı uğurla keçən təcrübəli futbolçudan şad xəbər var. 5 aylıq müalicə kursunu tamamlayan Rodriges növbəti dəfə karyerasını bərpa edib.

Düzdü, artıq onu xarici görünüşündə ciddi dəyişiklik var. Rodriges indi saçsız və saqqalsızdı. Üstəlik çəkisinin azaldığı da hiss olunur. Amma bu, onun ikinci dəfə xərçəng xəstəliyinə qalib gəlməsini yanında heç nədi.

Onu da vurğulayaq ki, Rodriges ''Las Palmas''ın öz yetirməsidi və indiyə qədər bu klubdan başqa heç yerdə oynamayıb. ''Las Palmas'' ötən mövsüm elitada oynasa da, sondan əvvəlki pilləni tutduğu üçün yeni mövsümdə aşağı liqada oynayacaq.