Mihayloviç yenidən ''xərçəng''ə qalib gəlməyə çalışacaq
''Bolonya''nın baş məşqçisi Sinişa Mihayloviçdən yenidən üzücü xəbər gəlib.
3 ilə yaxındı leykozdan, yəni qan xərçəngi xəstəliyindən əziyyət çəkən 53 yaşlı mütəxəssis növbəti dəfə müalicə kursuna başlamaq məcburiyyətindədi. ''Bolonya''nı çalışdıran Mihayloviç dünən bununla bağlı xüsusi mətbuat konfransı keçirərək bunları deyib: ''Xəstəliyimlə əlaqəli olaraq tez-tez müayinələrdən keçirəm. Son vaxtlar özümü yaxşı hiss etsəm də, bu xəstəlik çox ağıllı və bicdi. Son analizlər göstərdi ki, narahat olmaq üçün səbəb var. Xəstəlik qayıda bilər. Bunun qarşısını almaq üçün həkimlər mənə yenə müalicə kursundan keçməyi məsləhət gördülər. 2,5 il öncəki rəqibim daha güclü idi. Bu dəfə rəqibi güclənməyə qoymayacam və onu qabaqlamağa çalışacam. Bu xəstəlik mənim kimi bir insanla yenidən üzləşmək istəyirsə, deməli çox cəsarətlidi. Görünür, ona verdiyim birinci dərs az olub. İkinci dəfə də dərs verməliyəm. Bir neçə həftə komandanın başında ola bilməyəcəm. Amma bacardığım qədər tez qayıtmağa çalışacam. Fanatlarımızdan yeganə xaişim odu ki, komandaya dəstək versinlər. Mən də daxil olmaqla heç birimiz geri addım atmayacağıq. Komanda daha da yüksələcək və mən də tezliklə qayıdacam. Rəhbərliyə və komandaya mənə verdikləri dəstəyə görə təşəkkür edirəm''.
Qeyd edək ki, Mihayloviçin xəstəliyi ilk dəfə 2019-un iyulunda məlum olmuşdu. Təxminən bir ilə yaxın davam edən müalicə prosesi zamanı ötənlərin məhşur futbolçusu 1 dəfə sümük iliyi transplantasiyasından və 3 kimyaterapiya kursundan keçməli olmuşdu.
Digər xəbərlər
