Türkiyədə ötən mövsüm böyük bir sürprizə imza ataraq 3-cü pilləni tutan və Avropa Liqasında oynamağa haqq qazanan ''Samsunspor'' heyəti gücləndirməyə çalışır.

"Football-plus.az" xəbər verir ki, bu turnirdə mübarizəyə təsnifat mərhələsinin pley-offundan başlayacaq Samsun təmsilçisi transferdə problemlə qarşılaşıb.

Bu komanda Portuqaliya təmsilçisi ''Braqa''ya məxsus olan Co Mendesi İstanbula gətirib. Samsunlular 22 yaşlı futbolçunu tibbi müayinədən keçirdikdən sonra onunla rəsmi müqavilə imzalamağı planlaşdırırdılar. Amma sən demə bundan nə ''Braqa''nın xəbəri var, nə də futbolçunun menecerinin! Bu məlumatı türkiyəli insayder Yağız Sabuncuoğlu paylaşıb. Onun bildirdiyinə görə ''Braqa'' rəhbərliyi Mendesi hazırda Avstriyada toplanışda olan komandanın düşərgəsinə çağırıb.

Eyni zamanda Portuqaliya klubunun Samsun klubundan FİFA-ya şikayət edəcəyi məlum olub.

Qeyd edək ki, müdafiənin sağ cinahında oynayan Mendes İsveçdə doğulub və karyerasına bu ölkədə start verib. ''Braqa''ya isə 2023-cü ildə transfer olunub. İsveç yığmasında bir oyun keçirən Mendes ötən mövsüm icarə əsasında ''Bazel''in şərəfini qoruyaraq iki titul qazanıb.

Təbii ki, onun başqa kluba transferi üçün ilk növbədə ''Braqa''nın icazəsi olmalıdı. Çünki futbolçunun Portuqaliya klubu ilə 2028-ci ilə qədər müqaviləsi var.