“Turan Tovuz” Tovuz şəhər stadionundakı süni ot örtüyünü təbii qazonla əvəzləmək yönündə hərəkətə keçdiyini yazmışdıq.

“Football-plus.az” bu proseslə bağlı yeni məlumatlar əldə edib.

Belə ki, mütəxəssislər artıq stadionun əsas meydançasına baxış keçirib. Yaxın bir-iki gün ərzində klubun İdarə Heyətinin sədri Ehtiram Quliyev idman qurğusunu ziyarət edəcək və görüləcək işlərlə bağlı konkret addımların atılması üçün tapşırıqlar verəcək.

Prosesin tamamlanması üçün azı iki ay yarım vaxt tələb olunur. Xatırladaq ki, Misli premyer-liqasında yeni mövsüm avqustun 15-də start götürəcək. Bu o deməkdi ki, “bozqurdlar” yeni “futbol ili”nin ilk bir neçə ev oyununu başqa stadionlardan birində keçirməli olacaq.

Onu da bildirək ki, tovuzlular rayonun Abulbəyli kəndinin ərazisində yerləşəcək təllim-məşq sahəsinin inşasını da bu yay reallaşdırmaq istəyir. Klub iki hektara yaxın ərazidə ikisi təbii, biri süni örtüklü olmaqla, üç meydança salmağı planlaşdırır. Həmçinin meydançaların hazır vəziyyətə gətiriləcəyi vaxta qədər klubun aşağı yaş qrupu komandalarının məşqlərini və ev oyunlarını harda keçirəcəyi də bəlli deyil.

Qısası, “Turan Tovuz” yay aylarını infrastrukturla bağlı ciddi işlər görməklə keçirəcək.

KƏNAN BAHADIR