Niderlandın iddialı klublarından olan, 16 qat ölkə çempionu “Feyenoord” “İstanbulspor”un üzvü Qaussu Diarranı heyətinə qatıb.

"Football-plus.az" xəbər verir ki, bu transfer erediviziya klubuna 3,5 milyon avroya başa gəlib. Noyabrda 23 yaşını tamamlayacaq malili futbolçu yeni klubu ilə dördillik müqavilə imzalayıb.

Bura qədər hər şey normaldı və ilk baxışdan bu, adi bir transfer kimi görünür. Amma Diarranı başqalarından fərqləndirən mühüm bir məqam var. O heç bir klubun yetirməsi deyil, Türkiyəyə gələnə qədər, ümumiyyətlə, futbolla peşəkar səviyyədə məşğul olmamışdı!

Məsələ burasındadı ki, Diarra 2023-cü ildə İstanbulda təhsil almaq üçün Türkiyəyə gəlib. Konkret hansı universitetdə təhsil aldığı barədə məlumat olmasa da, onun karyerası “Tuzlaspor”da başladı. Ancaq burdakı macərası çox qısa çəkdi və faktiki heç bir oyunda meydana çıxmadan onunla yollar ayrıldı. Diarranın həyatının dönüş nöqtəsi “İstanbulspor”a gəlməsi oldu. Bu klubda əvvəlcə sınaqdan keçən forvard baş məşqçi Osman Zəki Korkmazın böyük simpatiyasını qazandı.

Geridə qoyduğumuz mövsümdə o, İstanbul klubunun heyətində 37 oyunda 16 qol, 2 məhsuldar ötürməlik performans sərgiləyərək 1-ci liqada mövsümün kəşflərindən biri oldu. Diarraya “Beşiktaş” da ciddi maraq göstərirdi. Amma o, karyerasını Avropada davam etdirmək istədiyinə görə “Feyenoord”un təklifini qəbul etdi.

Niderland höküməti tərəfindən işçi vizası verilən və Rotterdama yollanaraq tibbi müayinədən keçən Diarra dünən rəsmi müqaviləyə imza atıb. Yeri gəlmişkən, 3,5 milyon avro həm də Türkiyənin 1-ci liqası üçün rekord bir satışdı.