"Football-plus.az" xəbər verir ki, qaradənizlilər daha 2 futbolçunu heyətə qatıb. Bunlardan biri Batista Mendidi. “Nan”tın yetirməsi olan 23 yaşlı futbolçu son iki ili “Anje”də keçirmişdi. Bu kollektiv ötən mövsüm Liqa-1-i tərk etdiyindən Mendi klubunu dəyişmək istəyirdi. Fiziki göstəriciləri ilə diqqəti çəkən 191 sm boya malik fransalı dayaq yarımmüdafiəçisi srağagün Trabzona ayaq basıb. Tərəflər arasında dördillik müqavilə imzalanıb. Bu keçid “Trabzonspor”a 4,5 milyon avroya başa gəlib.
Amma “bordo-mavililər”in əsas “bombası” Nikolya Pepedi! Bir müddət öncə adı “Beşiktaş”la da hallanan tanınmış fransalı vinger sürpriz şəkildə “Trabzonspor”a transfer olunub. Baş məşqçi Nenad Byelitsanın da xeyir-duası ilə rəhbərlik bir andaca bu transferin üstünə düşərək fanatları sevindirib. “Foot Mercato”nun xəbərinə görə Pepe Byelitsa ilə telefonda söhbətləşdikdən sonra “Trabzonspor”un “1+1” illik təklfini qəbul etdi. 28 yaşlı fransalı vinger daha sonra onun üçün göndərilmiş xüsusi təyyarə ilə Fransadan Türkiyəyə gəldi. İlkin anlaşmadan sonra Pepe Türkiyəyə gəlib çıxmamış “Trabzonspor” forması ilə şəkil çəkdirməyə də razılıq verdi. Təyyarədə olarkən isə fanatlara bu mesajı göndərdi:
“Bu klubun bir parçası olduğuma görə sevincliyəm. Başqa təkliflər də var idi. Amma bu mövsüm Türkiyənin ən böyük klublarından biri ilə çempion olmaq istədiyim üçün bu təklifi qəbul etdim. Fanatlarımızla birlikdə bunu bacaracağıq. Ən qısa müddətdə görüşəcəyik. Bizə hər yer Trabzondu”.
Hələ ki keçidin maliyyə detalları barədə məlumat yoxdu. Qeyd edək ki, “Puatye”nin yetirməsi olan və peşəkar karyerasına burda başlayan Pepe daha sonra 4 il “Anje”nin şərəfini qoruyub. Onun ulduzu 2017-ci ildə 17 milyon avroya transfer olunduğu “Lill”də parladı. 2018/19-da Liqa-1-də vurduğu 22 qolla bombardirlər yarışında yalnız Mbappedən geri qalan futbolçu 2019-un yayında 80 milyon avroya böyük ümidlərlə “Arsenal”a transfer olundu. Amma məhz həmin andan etibarən Pepe karyerasında eniş yaşamağa başladı. Ona görə ödənilən pulun yaratdığı təzyiqin öhdəsindən gələ bilməyən və ümidləri doğultmayan Pepe 3 illik uğursuz “Arsenal” macərasının ardından ötən mövsümü icarə əsasında “Nitsa”da keçirdi (28 oyun, 8 qol, 1 ötürmə). London klubunda 112 qarşılaşmada 27 qol, 21 məhsuldar ötürməlik performans sərgiləyən və bu yay “Arsenal”dan ayrılaraq sərbəst oyunçuya çevrilən Pepe Türkiyədə yenidən yüksəlişə keçəcəyinə inanır.


