Ardanın ulduzu parladı, ''Real'' yarımfinala yüksəldi
Klublararası Dünya Çempionatında bütün yarımfinalçılar bəllidi.
"Football-plus.az" xəbər verir ki, 1/4 finalın ikinci oyun günü PSJ-nin ''Bavariya'' üzərində 2:0 hesablı inamlı qələbəsi ilə start götürdü. Münhen nəhəngi tək yarımfinala yüksəlmək şansını yox, həm də Camal Musialanı itirdi. İlk yarının son anlarında qapıçı Donnarumma ilə toqquşan gənc ulduzun ayağı çox pis şəkildə qırıldı.
Günün digər matçında isə ''Real'' çətinliklə də, olsa, Dortmund ''Borussiya''sını yenməyi bacardı. Uzun müddət inamlı təsir bağışlayan Madrid nəhəngi son anlarda rəqibə intriqanı bərpa etməyə imkan verdi. Mbappenin gözəl qolu və Kurtuanın son saniyələrdəki mükəmməl seyvi olmasaydı, ''Real'' üçün hər şey çox acınacaqlı şəkildə bitə bilərdi.
Hesabı açan gənc forvard Qonsalo Qarsiya yenə diqqət çəkməyi bacardı. O, cari turnirdə keçirdiyi 5 matçın hər birində ən azı bir qolun vurulmasında yaxından iştirak edən yeganə futbolçudu. Qarsiya 4 qolla ''Borussiya''lı Seru Girassi ilə birlikdə bombardirlər yarışına başçılıq edir. Amma dortmundlular üçün artıq turnir başa çatıb.
Xabi Alonsonun gəlişi ilə daha çox şans qazanmağa başlayan Arda Gülər isə oyunu ilə həm məşqçilər korpusunu, həm də fanatları sevindirməkdə davam edir. Gənc türkiyəli ulduz aktivinə iki məhsuldar ötürmə yazaraq matçın ən parlaq isimlərindən biri oldu. Alonso oyundan sonra Ardanın performansını dəyərləndirərkən bunları dedi:
''Arda ilk yarıda lazım olduqda müdafiəçilərin yanına çəkilərək və Bellingem ilə bağlantı quraraq bizə çox yardım etdi. Rəqibin cərimə meydançasına yaxın bölgələrdə çox təhlükəli futbolçudu. İki məhsuldar ötürməsindən başqa bir neçə təhlükəli zərbələri oldu. Daim oyunun içində idi. Hamımız ona yardım etməliyik. Matçdan öncə də söyləmişdim ki, Ardanın hələ öyrənməli olduğu çox şey olacaq. Ancaq oynaya-oynaya tədricən bütün çatışmazlıqlarını aradan qaldıracaq''.
Beləliklə, tarixdə ilk dəfə 32 komandanın iştirakı ilə keçirilən KDÇ-nin yarımfinalına 3 Avropa və bir Cənubi Amerika təmsilçisi yüksəlib.
Yarımfinalda ''Çelsi'' ''Fluminense'' ilə, Çempionlar Liqasının son qalibi statusunda olan PSJ isə ''Real'' ilə qarşılaşacaq.
Digər xəbərlər
