Məlum olduğu kimi, ölkəmizi Avropa Liqasında təmsil edəcək “Sabah” təlim-məşq toplanışı çərçivəsində ilk yoxlama matçını keçirdi. Rumıniya “Rapid”i ilə matç 2:2 hesablı heç-heçə ilə nəticələndi.

Oyunla bağlı diqqətçəkən məqamlardan biri də ötən ilin iyulundan “bayquşlar”ın şərəfini qoruyan Kahim Parrisin meydana çıxmaması oldu. Dəqiq desək, baş məşqçi Valdas Dambrauskas heyətdə olan legionerlərdən yalnız ona şans vermədi.

“Football-plus.az” bunun səbəbini araşdırmaq məqsədilə Masazır təmsilçisinin mətbuat xidmətinin rəhbəri Elnur Həmidovla əlaqə saxladı. Klub rəsmisi saytımıza açıqlamasında Parrisin təlim-məşq toplanışında olduğunu, ancaq yüngül zədəsi üzündən meydana çıxmadığını bildirdi.

Xatırladaq ki, “bayquşlar” daha bir yoxlama matçı keçirəcək. Onlar iyulun 3-də Macarıstan “Pakş”ıyla üz-üzə gələcək.

KƏNAN BAHADIR