Yay "transfer pəncərəsi" çərçivəsində David Oliveyra Tavareşlə güclənən "Turan Tovuz" növbəti transferini reallaşdırmaq üzrədi. Belə ki, "bozqurd" Roberto Olabeni rənglərinə bağlamağa hazırlaşır.

"Football-plus.az"ın məlumatına görə, "Real Sosyedad"ın yetirməsi olan ispaniyalı futbolçunun 29 yaşı var. O, karyerası ərzində ölkəsində "Berio", "Vilyarreal"ın C komandası, "Atletiko"nun B komandası, "Ekstramadura", "Eybar", "Albakete", "Alkorkon", "Deportivo" və "İbiza"nın, Portuqaliyada isə 2-ci liqa klubu "Tondela"nın şərəfini qoruyub.

Mərkəz yarımmüdafiəçisinin sonuncu klubu "İbiza"dı. Olabe bu komandanın heyətində 2024/25 mövsümündə meydana çıxdığı 33 oyunda 2 qol, 1 məhsuldar ötürmə müəllifi olub, 14 sarı vərəqə görüb.

"Transfermarkt"da orta sahə oyunçusunun bazar dəyəri 300 min avrodu. Onun ən bahalı dövrü 2019-cu ildə qeydə alınıb - 800 min avro. Futbolçunun "İbiza" ilə müqaviləsinin müddəti 2026-ci ilə qədərdi. Bu üzdən "Turan Tovuz"un adı çəkilən kluba 300 min avro civarında ödəniş edəcəyi gözlənilir.
Olabe İspaniya U-17 millisinin sabiq üzvüdü. Oyunçu indiyə qədər başı üzərində iki kubok qaldırıb. Bunlar "Atletiko"nın B komandasında tər tökdüyü vaxta təsadüf edib. Belə ki, o, 2017/18 mövsümündə Avropa Liqasının, 2018/19 "futbol ili"ndə isə UEFA Superkubokunun qalibi olub.

Həmkarlarımızın iddiasına inansaq, "bozqurd" Roberto ilə ikiillik müqavilə imzalayacaq.

KƏNAN BAHADIR