Klublarımızın arvokuboklardakı rəqibləri heyətlə bağlı islahatları davam etdirir.

“Football-plus.az”ın məlumatına görə, “Araz-Naxçıvan”ın qarşılaşacağı “Aris” Pedro Alvaro ilə güclənməyə yaxındı. Yunanıstan təmsilçisi 25 yaşlı portuqaliyalı ilə 3 illik müqavilə imzalamaq niyyətindədi.

Yerli mətbuat iddia edir ki, klub bu oyunçu ilə 3 illik müqavilə imzalayacaq. Alvaronun “Eştoril”lə (Portuqaliya) müqaviləsinin müddəti iyunun 30-da başa çatacaq. “Transfermarkt”a görə, müdafiəçinin bazar dəyəri 2 milyon avrodu. O, ötən mövsüm meydana çıxdığı 31 oyunda 1 qol, 1 məhsuldar ötürmə ilə yadda qalıb.

“Sabah”ın qarşılaşacağı “Selye” isə yeni futbolçu alıb. Sloveniyalılar Simon Sluqa ilə 2 illik müqaviləyə qol çəkib. 32 yaşlı qapıçının sonuncu klubu Təl-Əviv “Makkabi”sidi. O, 2024/25 mövsümündə İsrailin yüksək liqasında keçirdiyi 7 matçın 3-də qol buraxmayıb, 2-də isə 5 dəfə üzülüb. Hərəsində bir dəfə olmaqla İsrail və Xorvatiyada, üç dəfə isə Bolqarıstanda çempion olub. Həmçinin Xorvatiyada iki, Bolqarıstanda bir dəfə ölkə kubokunu başı üzərində qaldırıb. “Transfermarkt”da dəyəri 500 min avrodu.

“Zirə”nin rəqibi olan “Hayduk”la bağlı da xəbər var. Belə ki, Xorvatiya təmsilçisinin ulduz futbolçusu İvan Rakitiç komandanın təlim-məşq toplanışında iştirak etmir. Yerli mətbuat bunun səbəbini aydınlaşdıra bilməsə də, futbolçunun klubla müqavilə müddətinin iyunun 30-da başa çatacağını, ötən il imzalanan müqavilənin “1+1” illik olduğunu xatırladıb.

37 yaşlı yarımmüdafiəçi 2024/25 mövsümündə meydana çıxdığı 39 matçda 2 qol, 5 məhsuldar ötürmə ilə yadda qalıb.

KƏNAN BAHADIR