“Fənərbaxça”nının prezidenti Ali Koç biznesmen kimi xeyli uğurlu olsa da, bir idman idarəçisi kimi gözlənilənləri vermədi.

Əziz Yıldırımın dönəmində İstanbul təmsilçisi təkcə ölkədaxili yarışlarda iddialı deyildi, Çempionlar Liqasında da xeyli uğurlu qrafik cizmişdi. Amma onun adının “şikə olayları”na qarışması və həbs edilməsi ayrılığı qaçılmaz edirdi. Azarkeşlərin arasında nüfuzunu sürətlə itirən Yıldırım sonradan postunu Ali Koça təhvil verməli oldu. Özü də seçki yolu ilə. Yıdırımın Koça məğlub olduğu seçki prosesində ikincinin çıxışı zamanı işlətdiyi bir ifadə indiyə kimi yadımdadı:

Yazıma bir az uzaqdan giriş etdiyimə görə məni üzürlü sayın. Hərdən belə girişlər edirəm ki, yaddaşımızı təzələyək və Azərbaycan futbolunun durumuyla bağlı paralellər aparaq. Mən Ali bəyin bu sözlərini “Turan Tovuz”un yeni transferini təqdim edərkən xatırladım. Özü də bu xatırlama heç də təsadüf olmadı. Türkiyədə Atatürkün necə sevildiyi hər kəsə məlumdu. Eləcə də onun adı müxtəlif təbliğat üsullarında da istifadə olunur. O cümlədən də Ali Koç həmin vaxt böyük Atarürkün adını çəkib, özünün Atatürkçü olmasına işarə vurmaqla seçicilərin arasında olan müasir düşüncəli insanların sevgisini və səsini qazanmağa çalışmışdı. Necə ki, mən o ifadələri unutmamışam və xeyli bəyənmişdim, seçicilərin arasında da həmin sözlərə görə Koça səs verənlərinin sayının xeyli çox olduğuna şübhə etmirəm.

Azərbaycanda da klublar xaricdən futbolçu transfer edərkən Avropa klublarının, yığma komandaların və məşhur futbolçuların adından yararlanmağı xoşlayırlar. “Filankəsin həmyerlisi Azərbaycana gəldi”, “məşhur futbolçunun komanda yoldaşı Bakı klubunda”, “bu klubun yetirməsini hansı komandamız transfer etdi?” tipli pafoslu sərlövhələr hər transfer dönəmində idman mətbuatımızın manşetini bəzəyir. Amma sonrası heç də gözlənilən kimi olmur. Molla Nəsrəddin demişkən, nəzəriyyə ilə əməliyyə bir-birinə düz gəlmir, hay-küylə gələn əcnəbi futbolçu Azərbaycanı səssiz-səmirsiz tərk edir. Özü də gedəndə məvacibini təzminat kimi alır, ölkədən ciddi məbləğdə valyuta çıxarırlar.
Qayıdım Ali Koçun sözlərinə. Daha doğrusu, o sözləri nə üçün xatırlamağıma.

“Turan Tovuz” Kabo-Verde millisinin üzvü David Oliveyra Tavareşi transfer edib. 26 yaşlı yarımmüdafiəçi ilə üçillik müqavilə imzalanıb. Öz növbəmdə mən də “xeyirli-uğurlu olsun” deyirəm. Sonuncu dəfə Rumıniya təmsilçisi “Buzau”da oynayan Tavareşin “Benfika”nın yetirməsi olması xüsusi vurğu ilə azarkeşlərin nəzərinə çatdırılır. Lap yaxşı. Amma Ali Koç demişkən, önəmli olan futbolçunun “Benfika”nın yetirməsi olması yox, “Benfika”da neçə oyun keçirməsidi. İnternet qaynaqları bizi aldatmırsa, David Oliveyra “Benfika”nın əsas komandasında rəsmi oyun keçirməyib. Əvəzedici sayılan B komandasında isə üç mövsüm ərzində 36 dəfə forma geyib. Sonra da ortabab klublarda gününü keçirməklə məşğul olub.

Bəd gətirmək, “Turan Tovuz”un yeni transferini pisləmək istəmirəm. Ona qalsa, elə tovuzlu Budaq Nəsirov “Sportinq”in futbolçusu olub. Di gəl ki, indi heç Azərbaycanın 2-ci liqasında belə oynaya bilmir. Ümid edək ki, Tavareş ona bəslənən ümidləri doğruldacaq, “Benfika”nın yetirməsi kimi orda öyrəndikləri ilə “Turan Tovuz”a xeyir verəcək. Yeganə istəyimiz budu.

AMAL