''Fənər''in əfsanəsi Mourinyonun köməkçisi olacaq?
Fanatlarına zülm verməkdə davam edən ''Fənərbaxça''nın məşqçilər korpusu ilə bağlı yeni iddia ortaya atılıb.
Joze Mourinyo kimi məşqçi ilə də çempionluq həsrətinə son qoya bilməyən ''Fənərbaxça'' məşqçilər korpusuna yerli isim əlavə etmək qərarına gəlib.
İddialara görə bu məsləhəti Əli Koça Əziz Yıldırım verib. Onlar arasında ötən həftə bir görüş baş tutdu. Yıldırım sabitlik üçün Əli Koça Mourinyo ilə yola davam etməyi məsləhət görsə də, onun yanına Türkiyə şərtlərini bilən yerli bir məşqçi gətirməyi tövsiyə edib. Belə məşqçilərin başında isə Volkan Dəmirəl gəlir.
Uzun illər ''Fənər''in qapısını qoruyan, futbolçu kimi klubun əfsanələrindən olan Volkanın artıq məşqçi kimi də təcrübəsi var. O, superliqada ''Fatih Karagümrük'', ''Hatayspor'' və son olaraq ''Bodrum''u çalışdırıb. Bu arada 43 yaşlı mütəxəssis ''A Spor'' kanalına açıqlamasında bir gün ''Fənər''i çalışdırmaq arsuzunu yenidən dilə gətirib:
''Bu işlər həm də qismətdən asılıdı. Təbii ki, ''Fənər''i böyük məmnuniyyətlə çalışdırmaq istəyərəm. Amma hər şeyin zamanı var. Doğru zamanı gözləmək lazımdı. Komandada nə çatışmır deyə soruşsaz, bu suala cavab verə bilməyəcəm. Bu mövsüm üçün çempionluq mübarizəsi bitdi. Amma yeni mövsüm həm də yeni şans deməkdi. Sadəcə mübarizə aparmaq lazımdı. Yetər ki, o duyğunu, mübarizə əzmini itirməyək''.
Amma Volkanın açıqlamasından hiss olunur ki, o, baş məşqçi kimi İstanbul nəhəngində işləmək istəyir. Köməkçi kimi isə onun Mourinyo ilə işləməyə razılıq verib-verməyəcəyi bilinmir. Özü də Dəmirəl bu mövsüm bir neçə dəfə Mourinyonu sərt şəkildə tənqid edərək ona ''Fənərbaxça''dan ayrılmağı məsləhət görüb.
Digər xəbərlər
