Futbolla, xüsusən də Rusiya futbolu ilə yaxından maraqlananlar Tufan Sadıqov ad-soyadını dəfələrlə eşidib. Gürcüstanda dünyaya gələn və Rusiyada bizneslə məşğul olan soydaşımız son illərdə daim qalmaqalların mərkəzindədi. O, Moskva vilayətini təmsil edən və Rusiya premyer-liqasında mübarizə aparan “Ximki”nin əsas səhmdarı idi.

Ötən ilin dekabrında yüksək məbləğdə fırıldaqçılıqda suçlanan Sadıqov haqda ev dustaqlığı qərarı verilmişdi. Sonradan bu cəza yumşaldıldı, daha dəqiqi, soydaşımız girov qoymaqla ev dustaqlığından qurtuldu. Hətta martda Rusiya mediasına müsahibə verən Tufan bəy klubun gələcəyi ilə bağlı danışarkən “bütün sponsor şirkətlərlə 5 illik müqaviləmiz var, mən burdayamsa, deməli, hər şey yaxşıdı” demişdi. Bəs sonda nə oldu? Heç nə. Fiasko. Komanda elitada yerini qorusa da, rəhbərlik maliyyə probleminin öhdəsindən gələ və növbəti mövsüm elitada çıxış etmək üçün lisensiya ala bilmədi. Nəinki elitada, hətta aşağı divizionlarda da “Ximki”ni görmək mümkün olmayacaq. Ona görə ki, klub iyunun 18-də rəsmi saytı vasitəsi ilə fəaliyyətini dayandırdığını elan edib və müflislik proseduruna başlayıb.


Bütün bu xəbərlərin fonunda Sadıqovun 2025/26 mövsümündə ilk dəfə Türkiyə 1-ci liqasında mübarizə aparacaq “Serik Bələdiyəspor”un səhmlərinin 50 faizini alması haqda yayılan xəbərlər ən azı gülüş doğurur. Rusiya mətbuatında yayılan xəbərlərə inansaq, guya azərbaycanlı biznesmen adı çəkilən klubun səhmlərinin yarısını alıb, baş məşqçi postuna da yaxından tanıdığı, vaxtilə ölkəmizdə də çalışmış Sergey Yuranı gətirəcək. Düzdü, azərbaycanlı iş adamı "Sport-Ekspress"ə verdiyi açıqlamada bu xəbəri təkzib edib:

Öz aramızdı, nağıl olsa da, gerçəyə çox bənzəyir. Axı Türkiyə çempionatının aşağı dəstələri Tufan Sadıqov kimi biznesmenlər-işbazlar üçün çox münbit məkandı. Qonşu ölkənin klublarından illərdi FİFA-ya axın-axın şikayət gedir, onlara dəfələrlə transfer qadağası qoyublar, hüquqazidd əməllərə görə cərimələnənlər də çoxdu.

Bir sözlə, Sadıqov Türkiyədə “lövbər salsa”, şəxsən mən təəccüblənmərəm. Amma Azərbaycanın adını bu şəkildə tanıtmaq nəyə lazımdı – bax, bu haqda danışmaq ağırdı.

ORXAN