Emin Ağayev “Ximki”nin əvəzedicilərindən U-19 komandasına qayıtmalarının səbəbini açıqladı - ÖZƏL
Nazim Süleymanovla Emin Ağayevin Rusiya premyer-liqasında çıxış edən “Ximki”də fəaliyyət göstərir. Hər iki mütəxəssis Moskavaətrafını təmsil edən klubun əvəzedici komandasını çalışdırırdı. Ancaq bu günlərdə onların U-19 komandasına göndərildiyi, “ikincilər”in “sükan”ının isə başqa məşqçiyə tapşırıldığı haqda xəbər yayıldı. Onu da qeyd edək ki, “Ximki”nin sahibi həmyerlimiz Tufan Sadıqovdu.
Azərbaycanlı mütəxəssislərin əvəzedici komandadan ayrılmasının səbəbini öyrənmək üçün Emin bəylə əlaqə saxladıq. Ağayev “Football-plus.az”a açıqlamasında başverənlərə belə münasibət bildirdi:
“Rinat Bilyaletdinov əvəzedici komandanın baş məşqçisi təyin olundu. Biz isə rəhbərliyin qərarı ilə U-19-a göndərildik. Bizə dedilər ki, bu komandanı siz yığmısız və futbolçuları yaxından tanıyırsız. Maaşımız da yerindədi. Başqa səbəb yoxdu. Vəziyyətimiz yaxşıdı, heç nədən şikayətçi deyilik. Komandanın inkişafı üçün hər cür şərait yaradılıb”.
Ağayev elitanı tərk etmək üzrə olan “Ximki”nin əsas komandası ilə bağlı fikrini də bölüşdü:
“Son iki oyunda komanda 4 xal toplayıb. Ümid edirik ki, pley-off matçlarında arzulanan nəticəni qazanıb elitada yerini qoruyacaq. Premyer-liqada qalacağımız halda növbəti mövsümlə bağlı klub rəhbərliyinin böyük planları var”.
RƏŞAD
Digər xəbərlər
