“Lokomotiv” cəzalanmaq təhlükəsi ilə üzləşsə də, sanksiyaya məruz qalmayıb.

“Ximki” rəhbərliyi Moskva klubundan Rusiya Futbol İttifaqının (RFİ) Nizam-İntizam Komitəsinə (NİK) şikayət etmişdi. Bu komandalar arasında Rusiya premyer-liqasının 20-ci turu çərçivəsində keçirilən matç “Lokomotiv”in 3:2 hesablı qələbəsi ilə nəticələnmişdi. “Dəmiryolçular”ın qələbə qolunu vuran Yan Kuxta Çexiya çempionatının “Banik”lə ötən ilin dekabrında keçirilən oyununda (3:3) qırmızı vərəqə almışdı. Yanvarda Moskva klubuna transfer olunan “Slaviya”nın 25 yaşlı sabiq hücumçusu cəzasını ölkəsində çəkmədən Rusiya çempionatında debüt etmişdi.

“Ximki” rəhbərliyi onun martın 6-da “Lokomotiv”in heyətində meydana çıxmaq hüququnun olmadığını iddia edirdi. NİK bu iddianı əsaslı sayacağı halda paytaxt komandasına texniki məğlubiyyət (0:3) veriləcəkdi.

Qeyd edək ki, FİFA-nın qaydasına əsasən, futbolçu ölkə çempionatını dəyişsə də, əvvəlki liqada aldığı cəzanı çəkməlidi. “Lokomotiv”in yeni oyunçusu isə cəzasını Rusiya kubokunun 1/8 finalının martın 3-də keçirilən “Yenisey”lə oyununda (0:4) ödəməli idi. Lakin Kuxta həmin matçda iştirak etsə də, “Yenisey”dən NİK-ə şikayət edilməyib. Buna görə çex futbolçunun “Ximki”yə qarşı oynamaq hüququ olub.