Turnirə xal itkisi ilə start verən “İnter” üçün qrupun ikinci oyunu da çətin keçdi.

"Football-plus.az" xəbər verir ki, Çempionlar Liqasının son finalçısı “Urava Red Daymonds”la oyunda sürpriz şəkildə erkən qol buraxdı və fasiləyə 0:1-lə yollanmaq məcburiyyətində qaldı.

Baxmayaraq ki, komanda ilk yarıda topa 84 faiz (!) nəzarət etdi. Yeri gəlmişkən 28 yaşlı Vatanabe KDÇ tarixində Asiya klubunun heyətində İtaliya klubuna qol vuran ilk futbolçu oldu. Milan nəhəngi uzun müddət “yapon divarı”nı yara bilmədi.

Ümumiyyətlə, “İnter” Martinesin dirəyə dəyən baş zərbəsindən başqa heç bir təhlükə yarada bilməmişdi və 77-ci dəqiqəyə “Urava” hesabda öndə daxil oldu. Ancaq “İnter”in “çərçivə”yə düşən ilk zərbəsi qolla nəticələndi! Müdafiəçilərin gözündən yayınan təcrübəli Martines künc zərbəsi zamanı baxımlı qol vurdu. Əzmkar yaponlar belə oyunun qarşılığında ən azı 1 xal qazanmağa layiq idi. Amma son anlarda gənc argentinalı müdafiəçi Karboni səhnəyə çıxdı. O, müdafiəçidən dönən topu tora göndərdi. Yaponiya təmsilçisi bu nəticə ilə pley-offa yüksəlmək şansını itirdi.

Qrupun digər oyununda “River Pleyt” nə qədər çalışsa da, Serxio Ramoslu “Monterrey”in müdafiəsini yara bilmədi. Gərgin keçən, 9 sarı, 1 qırmızı vərəqəyə səhnə olan oyun qolsuz başa çatdı. Qrup liderləri - “River Pleyt” ilə “İnter” son turda bir-biri ilə qarşılaşacaq. Maraqlıdı ki, həmin oyunda 0:0 və 1:1-dən başqa istənilən hesablı heç-heçə hər iki komandanı pley-offa daşıyacaq. “Monterrey” qalib gələcəyi və “River” ilə “İnter”in oyunu qolsuz bitəcəyi təqdirdə Argentina nəhəngi mübarizəni dayandırmalı olacaq. “İnter” ilə “River” 1:1 oynayacağı və “Monterrey” 3 xal qazanacağı halda, artıq Argentina və Meksika klublarının top fərqinə baxılacaq.

E qrupu, 2-ci tur
İnter – Urava Red Daymonds 2:1 (0:1)
İnter (Milan, İtaliya): Zommer, Enrike (Suçiç, 85), Darmian, De Vrey, Auqusto, Dimarko (Bastoni, 72), Barella, Asllani (Karboni, 72), Zalevski (Mxitaryan, 46), S.Esposito (F.Esposito, 46), L.Martines.
Urava Red Daymonds (Saytama, Yaponiya): Nişikava, İşihara, Danilo, Hoybraten, Naqanuma (Oqivara, 87), Qustafson (Haraquçi, 87), Yasui, Kaneko (Sekine, 66), Savio (Matsumoto, 79), Vatanabe, Matsuo (Santana, 79).
Qollar: Vatanabe, 11 (0:1). L.Martines, 78 (1:1). Karboni, 90+2 (2:1).
Vərəqələr: Nişikava, 61. Sekine, 67. Santana, 80 – sarı.
Hakim: Beyda Dahan (Mavritaniya).
21 iyun. Sietl. 25090 tamaşaçı.

River Pleyt – Monterrey 0:0
River Pleyt (Bueno Ayres, Argentina): Armani, Q.Montyel, Martines Kuarta, Dias, Akunya, Peres (Kranevitter, 84), Qaloppo (İ.Fernandes, 71), Kastanyo, Mastantuono (Q.Martines, 84), Mesa (Borxa, 71), Kolidio.
Monterrey (Meksika): Andrada, Agirre, Medina, Ramos, Arteaqa, X.Rodriges (Viktor Andres Qusman, 79), Deossa, Korona (Roxas, 64), Okampos (La Rosa, 64), Berterame (Ambris, 64), Kanales (Alvarado, 88).
Vərəqələr: Peres, 17. X.Rodriges, 18. Kastanyo, 28. Qaloppo, 56. Mesa, 63. Medina, 66. Alvarado, 90. Agirre, 90. Ambris, 90+2 – sarı. Kastanyo, 90+1 – qırmızı (ikinci sarı).
Hakim: Slavko Vinçiç (Sloveniya).
21 iyun. Los Anceles. 57393 tamaşaçı.

1. River Pleyt 2 1 1 0 3-1 4
2. İnter 2 1 1 0 3-2 4
3. Monterrey 2 0 2 0 1-1 2
4. Urava Red Daymonds 2 0 0 2 2-5 0