Holann “Leyptsiq”in qapısına qolları sıraladığı vaxtda “Draqau”da “Portu” və “İnter” sanki qol güləşinə çıxmışdı.

"Football-plus.az" xəbər verir ki, bu matçda qapılara qol vurulmasa da, futbolsevərlər 90 dəqiqə ərzində olduqca həyəcanlı və emosional bir qarşılaşma izlədilər. “İnter” gözəl başa düşürdü ki, bütün oyunu müdafiədə keçirməklə və minimal üstünlüyü qorumağa çalışmaqla mərhələni adlamaq çətin olacaq. Ona görə də komanda ara-sıra hücumlar etməyə çalışırdı. Serjio Konseysaonun kollektivi faktiki ilk yarını boşa verdi. Çünki ərazi üstünlüyünə baxmayaraq, Onananın qapısı önündə heç bir ciddi təhlükə yaranmadı. Əksinə, qonaqların hücumları daha təhlükəli alınırdı və belə təəssürat yaranırdı ki, qol “Portu”ya yox, “İnter”ə lazımdı. Fasilədən sonra “əjdahalar” yavaş-yavaş təzyiqi artırmağa başladılar. Cinah asmaları və qapıya zərbələrin sayı hər ötən dəqiqə artırdı. Son yarım saatda Onana, nəhayət, oyuna ciddi şəkildə qoşulmağa başladı. Kamerunlu qapıçı seyvləri ilə matçda damğa vuraraq gecənin qəhrəmanlarından biri oldu. “Portu” son anlarda faktiki müdafiəni unudaraq bütün komanda ilə irəli atıldı. Bunu anlamaq olardı. Çünki 0:0 meydan sahibləri üçün məğlubiyyətə bərabər nəticə idi. Əsas vaxta əlavə olunmuş 7 dəqiqə ərzində isə “Draqau”da inanılmaz şeylər baş verdi. “Portu” sanki “İnter”ə yox, futbol Tanrısına qarşı vuruşurdu. Çünki top heç cür qapıya daxil olmaq istəmədi. Əvvəlcə Dyumfris topu qapı xəttindən çıxardı. Əlavə olunmuş 5-ci dəqiqədə isə “Portu”nun bir hücumunda top iki dəfə dirəyə tuş gəldi! Tareminin yaxın məsafədən baş zərbəsi zamanı Onana dirəklə birləşərək qola imkan vermədi. Hücumun davamında isə Qruyiçin zərbəsi tirə tuş gəldi. Bu epizodda milanlıların açıq-aşkar bəxti gətirdi. “Portu”lular bu cür bəxtsizlikdən sonra hisslərinə hakim olmaqda çətinlik çəkirdilər. Son saniyələrdə Akinonun qırmızı, Konseysaonun sarı vərəqə alması da bununla bağlıdı. Polşalı hakimin bu dramatik matçın final fitini səsləndirməsindən sonra “Portu”lular çarəsizlikdən yerə sərələndilər. Hətta Qruyiçin timsalında göz yaşlarını saxlaya bilməyənlər də oldu. Hər halda, portuqaliyalılar əlindən gələni etdi. Amma bu, mərhələni adlamaq üçün kifayət etmədi...

oyunun statistikası
19 (5) qapıya (“çərçivə”yə) zərbə 11 (5)
6 künc zərbəsi 3
2 ofsayd 2
11 qayda pozuntusu 18
2(1) sarı (qırmızı) vərəqə 3(0)
68 topa sahibolma (faizlə) 32

Faktlar
* “İnter” ÇL-də 2010/11-dən bəri ilk dəfə 1/4 finala yüksəldi. Komandanın ÇL-in pley-offunda hər iki oyunda qol buraxmadan mərhələ adlamasına sonuncu dəfə 2009/10-da rast gəlinmişdi.
* 2005/06-dan bu yana ilk dəfə “İnter” və “Milan” eyni mövsümdə ÇL-in 1/4 finalına yüksəldilər.
* “İnter” Portuqaliyada keçirdiyi ardıcıl 6-cı oyunda qalib gələ bilmədi (4 heç-heçə, 2 məğlubiyyət). Komanda bu qarşılaşmalarda cəmi 1 qol vurub.