“Neftçi” ötən gün 12-ci futbolçu ilə yollarını ayırdı. Daha iki futbolçu da getsə (ehtimal çox böyükdü), bu heyətin tam yarısı deməkdi.

Əvəzedici heyətdən bir-iki oyunluq gələnləri saymasaq, son mövsümdə 28 futbolçu “Neftçi”yə xidmət edib. Rüstəm Samiqullin icarə əsasında gəlmişdi, Dembo Darbo, Robert Bauer və Rafael Quzzo ilə müqaviləyə qarşılıqlı razılıqla xitam verilib. Filip Ozoviç, Ervin Koffi, Azər Salahlı, Azər Əliyev, Höccət Haqverdi, Rəhman Hacıyev, Yuri Matias və Yeqor Boqomolski ilə başa çatan müqavilə yenilənməyib.

Ayrılan futbolçulardan Yeqor Boqomolski “Zirə”, Ervin Koffi isə Fransanın 2-ci liqa təmsilçisi “Genqam” ilə anlaşıb. Ayrılan yerli futbolçuların hansınınsa legioner həyatı yaşacağı inandırıcı deyil.
Bu gündən etibarən komanda təlim-məşq toplanışına start verir. Maraqlıdı ki, komandanın hazırda cəmi bir müdafiəçisi var - Mustafa Sek. 12 futbolçunu yola salan “Neftçi” hələ ki rəsmi şəkildə cəmi bir futbolçu ilə anlaşıb. Bu da Sessi D`Almeydadı. Aydın məsələdi ki, klub hələ “dağıdıcılıqla” məşğuldu. Qarşıdakı həftələrdə transferlərin açıqlanacağını gözləmək olar. Amma transferdə əsas olan say yox, keyfiyyətdi, “Neftçi”də bu klubun əzəmətini dərk edənlər oynamalıdı.

Möcüzə baş verməsə, Murad Xaçayevlə Elvin Bədəlov da komandaya qoşulacaq. Növbəti transfer isə “Araz-Naxçıvan”ın mərkəz müdafiəçisi İqor Ribeyrodu. “Ağ-qaralar” Ruminiyanın “Universitatya Krayova” komandasından dayaq yarımmüdafiəçisi, yaponiyalı Takuto Oşima ilə də anlaşmağa yaxındı. 27 yaşlı futbolçu ötən mövsüm 25 oyuna çıxıb, bir qol, iki məhsuldar ötürmə ilə yadda qalıb.

MÜZƏFFƏR QULUZADƏ