“Neftçi” ötən şənbə yeddi futbolçu – Yeqor Boqomolski, Azər Əliyev, Azər Salahlı, Yuri Matias, Rəhman Hacıyev və Höccət Haqverdi ilə müqavilə müddətinin uzadılmadığını elan etdi. Həmçinin “Sabah”dan icarə əsasında gətirilən Rüstəm Samiqullin də komandadan gedib.

Beşi yerli statusuna malik olmaqla, yeddi futbolçu ilə yolları ayıran “Neftçi” bu qərarı verməkdə nə dərəcədə düz edib? Əslində bu futbolçuların hər birinin adını qəzetimizin son sayında “getməli olanlar” siyahısında göstərmişdik.

Bəs görəsən bu futbolçular çempionatın son mövsümümdə nə ilə yadda qalıb?

Yeqor Boqomolski: 12 oyun, 1 qol
Azər Əliyev: 10 oyun, 1 məhsuldar ötürmə
Azər Salahlı: 18 oyun, 0 məhsuldarlıq
Yuri Matias: 28 oyun, 2 qol, 1 məhsuldar ötürmə
Rəhman Hacıyev: 20 oyun, 0 məhsuldarlıq
Höccət Haqverdi: 26 oyun, 0 məhsuldarlıq
Rüstəm Samiqullin: -

Belaruslu Boqomolski komandaya gənc, perspektivli hücumçu kimi gətirilmişdi. Amma baş məşqçi nə qədər güvənsə də, futbolçu özünü göstərə bilmədi ki, bilmədi. Azər Əliyev “milliləşdirilən” futbolçulardandı. 7 nömrəli müdafiəçi adaşı Azər Salahlı ilə birgə həmişə ən çox tənqid olunan futbolçulardan idi. Yuri Matias “Neftçi” tarixinin ən ziddiyyətli obrazlarından biridi. Nə qədər liderlik keyfiyyəti olsa da, “Qarabağ”la oyunlarda etdiyi ciddi səhvlər, qeyri-sabitliyi işləri korladı. Rəhman Hacıyev isə Mutunun cokeri kimi yaddaşlarda qalacaq. “Neftçi” azarkeşləri onu sevdi, lakin hər yolun sonu var. Höccət Haqverdinin “Sumqayıt” performansı “Neftçi”ni aldatdı. Qurtula bilmədikləri futbolçulardan biri oldu.

Görünən odu ki, flaqman doğru yoldadı. Qalır bəzi futbolçuları da yola salmaq və tutarlı transferlər etmək.

MÜZƏFFƏR QULUZADƏ