“Neftçi”nin yollarını ayırdığı 12 futbolçudan biri də Filip Ozobiçdi.

Maraqlıdı ki, heyətdə ciddi dəyişikliklərin tərəfdarı olan azarkeşlərin əksəriyyəti bu ayrılığı sevinclə qarşılamadı. Onlar oyunçunun “ağ-qaralar” üçün vacib fiqur olduğunu, növbəti mövsümdə komandaya fayda verə biləcəyini yazdı və qərarı qınadı.

Bəs paytaxt təmsilçisi Ozobiçlə vidalaşmaqda haqlıdımı? Bu suala cavab axtaraq.

2023-cü ilin yayında “Qarabağ”ı “Neftçi”yə dəyişən yarımmüdafiəçi yeni klubuyla 2 illik müqavilə imzaladı. O, “ağ-qaralar”ın formasını geydiyi müddətdə meydana çıxdığı 70 rəsmi oyunda 16 qol vurub, 13 məhsuldar ötürmə verib. Bəli, 34 yaşı var, amma bu məqam onun başa çatan mövsümdə qeydə alınan göstəricilərinə təsirsiz ötüşüb desək, yanılmarıq.

Belə ki, Ozobiç 2023/24 mövsümündə meydana çıxdığı 37 matçda 8 qol, 8 məhsuldar ötürmə, 2024/25 “futbol ili”ndə şans qazandığı 33 oyunda isə 8 qol, 5 məhsuldar ötürmə müəllifi olub. Təcrübəli yarımmüdafiəçi başa çatan mövsümdə “Neftçi”nin ən, premyer-liqamızın 12-ci məhsuldar oyunçusu olub.

Bu baxımdan “ağ-qaralar”ın Ozobiçlə yeni müqavilə imzalamamasının başlıca səbəbinin yaş olduğunu düşünmək olar. Lakin belədə 32 yaşlı Emin Mahmudov və 29 yaşlı Ramil Şeydayevlə yola davam etmək birmənalı qarşılana bilməz. Axı Ozobiçdən qat-qat çox maaş aldığı bəlli olan futbolçular komanda üçün onun qədər faydalı olmayıb.

Hər halda, baş məşqçi Samir Abasovun heyəti gəncləşdirmək niyyətində olduğu bəllidi. Komandanı indiyə qədər tərk edən futbolçuların yaşına nəzər salsaq, bunun şahidi olarıq. Təki islahatlar fayda versin. Əks halda, Ozobiçin də ahı Samir Abasovun üstündə qalacaq, azarkeşlərin də...

KƏNAN BAHADIR