Ötən həftə Türkiyə Futbol Federasiyasında ortaya çıxan böyük bir qalmaqal yekunda istefa ilə nəticələnib.

Belə ki, qurumun nəzdində fəaliyyət göstərən Nizam-İntizam Komitəsinin üzvlərinin öz aralarındakı ''vatsapp'' yazışmalarının ortaya çıxması ilə əsil ''bomba'' partlamışdı. Bitərəf mövqe sərgiləməli olan bu komitənin üzvləri həmin yazışmalarda ''Qalatasaray''ın lehinə, ''Fənərbaxça''nın isə əleyhinə olan ifadələr işlətmişdilər. Türkiyəli jurnalist Tahir Kumun ortaya çıxardığı yazışmalarda qurumun bir üzvü maşındakı kilometrajın 1905-i göstərməsinin ona ''Qalatasaray''ı xatırladığını demişdisə, digər üzvü ''Mourinyoya qarşı bu mövsüm çox yumşaq davrandıq, gələn mövsüm əvəzini çıxarıq'' ifadəsini işlətmişdi.

Bu qalmaqalın ardından ''Fənərbaxça'' sərt bir bəyanat yaymış, məsələnin araşdırılmasını, eləcə də komitə üzvlərinin istefasını tələb etmişdi. İstefa xəbərləri isə artıq gəlməyə başlayıb. NİK-in sədri Cəlal Nuri Dəmirtürk, eləcə də onun köməkçiləri Taha Çalık ilə Sərhat Çətin istefa verib!

Federasiya prezidenti İbrahim Hacıosmanoğlunun qərarı ilə NİK-in başına Başbuğ Pınarbaşı gətirilib. Onun köməkçiləri vəzifəsini isə Abdulla Adır və Yusuf Ziya Taşkın icra edəcək.