Mahir Emrelinin Almaniyanın 2-ci bundesliqa təmsilçisi “Kayzerslautern”lə üçillik müqavilə imzaladığını, yaxın günlərdə transfer xəbərinin klub tərəfindən ictimaiyyətə elan ediləcəyini yazmışdıq. Həmin vaxtdan üç gün ötsə də, bu barədə yeni bilgi ortaya çıxmayıb. Amma narahat olmayın! İndiyə qədər mövzu haqda fərqli informasiya yayılsa da, bilginin özəyi – həmyerlimizin karyerasını “qırmızı iblislər”in heyətində davam etdirəcəyi ilə bağlı ifadələr təkzib edilməyib. Sadəcə, bir qədər də dişimizi sıxmalıyıq. Gözləmək lazımdı. Nə qədər? Bilmirik, lakin ən qüvvətli ehtimal keçidin baş tutması barədə xəbərin məhz bu gün rəsmən açıqlanacağı yönündədi!

Əvvəla yuxarıda bəhs etdiyimiz fərqli informasiyalara aydınlıq gətirək. Bəzi həmkarlarımız müqavilə müddətinin 3 yox, “2+1” illik olacağını iddia edib. Daha əvvəl Mahirin Türkiyənin Antalya şəhərində sevgilisi ilə birlikdə istirahət etdiyini bildirmişdik. Həmin vaxtdan bəri sosial şəbəkə hesablarında yalnız tətillə bağlı paylaşımlar edən həmyerlimiz, nəhayət, srağagün fanatlarını həyəcanlandıracaq hərəkət etdi: qaranlıq arxa fonda sona doğru yaxınlaşan qum saatı paylaşdı. Təbii ki, bu ərəfədə belə paylaşım yeni klubunun tezliklə bəlli olacağını bildirməkdən başqa nəyəsə xidmət etmir. Ancaq Emrelini də maraqlandıracaq daha bir məqam var. 27 yaşlı hücumçununu adının “Kayzerslautern”lə hallanmağa başlamasından sonra, təbii ki, bir gözümüz klubun rəsmi saytında idi. Axı gözlənilən məlumat məhz burda yer alacaq. İş ondadı ki, saytın “xəbərlər” bölməsini oxuyanda komandanın artıq yay təlim-məşq toplanışına başlamaq üzrə olduğunu öyrəndik. Dəqiq desək, “qırmızı iblislər” srağagün müvafiq tibbi müayinələrdən keçmək məqsədilə bir araya gəlib. Kollektiv sabah təlim-məşq toplanışına start verəcək. Odu ki, Emrelinin ən qısa zamanda komandaya qoşulmasında fayda var. Hər halda, hadisələrin axarı göstərir ki, Mahir – “Kayzerslautern” izdivacının məhz bu gün ictimaiyyətə elan olunması ehtimalı yetərincə yüksəkdi.

Xatırladaq ki, Emreli başa çatan mövsümdə Almaniyanın digər 2-ci bundesliqa təmsilçisi “Nürnberq”də çıxış edib. O, bu komandanın heyətində meydana çıxdığı 24 liqa matçında 10 qol, 1 məhsuldar ötürmə ilə yadda qalıb. Almaniya kuboku çərçivəsində meydana çıxdığı yeganə qarşılaşmada isə 1 qol vurub.

KƏNAN BAHADIR