Nəhayət, Mahir Emrelinin karyerasıyla bağlı narahatlıq sona çatdı. Ona görə ki, həmyerlimizin 2025/26 mövsümünü harda keçirəcəyi bəllidi. 27 yaşlı hücumçu Almaniyanın 2-ci bundesliqa təmsilçisi “Kayzerslautern”lə 3 illik müqavilə imzalayıb! Bu barədə xəbəri təkcə ünlü insayder Florian Plettenberq yox, Almaniyanın aparıcı nəşri “Bild” də yayıb.

Xatırlayırsızsa, futbolçu İngiltərə və İtaliya klublarından da təklif almışdı. Hətta “Neftçi”dən də. Göründüyü kimi, Almaniyada – tanıdığı və alışdığı çempionatda qalmağa qərar verdi. Hər halda, ilk baxışdan qərarın doğru olduğu aşkardı. Biz də dəfələrlə ən düzgün addımın yola məhz 2-ci bundesliqada davam etməyin olduğunu yazmışıq. Təbii ki, 1-ci bundesliqada klublarından gələn təkliflər real deyilsə...

Bəs Mahir bu qərarı necə verdi? “Bild” durumu belə izah edir:

Beləliklə, qalan məsələlərə zaman aydınlıq gətirəcək. Mahirin yeni iş yeri ilə yaxından tanış olmağa dəyər.

“Kayzerslautern” eyniadlı şəhərin təmsilçisidi. “Qırmızı iblislər” ləqəbiylə tanınan klub 125 il əvvəl – 1900-cu ildə qurulub. Kollektiv tarixində 4 dəfə Almaniya çempionu olubsa, 2 dəfə ölkə kubokuna, 1 dəfə Almaniya superkubokuna yiyələnib. Ölkənin köklü klublarından biri tarixinin ən uğursuz dönəmlərini məhz 21-ci əsrdə yaşayıb. 2012-ci ildə bundesliqanı tərk edən, 2018-ci ildə hətta 3-cü bundesliqaya düşən komanda 2-ci bundesliqaya 2022-ci ildə yüksələ bilib. “Kayzerslautern”in yaxşı günləri də bu vaxtdan başlayıb. 2023/24 mövsümündə ölkə kubokunun finalına qədər irəliləyən komanda burda “Bayer-04”ə minimal hesabla (0:1) uduzub.

“Qırmızı iblislər” 2023/24 mövsümünü 18 komanda arasında 13-cü, 2024/25 mövsümünü 7-ci yerdə bitirib, daha dəqiqi, 53 xalla 5-7-ci yerləri bölüşüb. “Transfermarkt”da klubun dəyəri 32,45 milyon avro göstərilib. “Kayzerslautern”in 1-ci bundesliqaya yüksəlmək uğrunda mübarizə aparmağa davam etməsi sürpriz deyil. Ona görə ki, klub daha əvvəl iki dəfə (1997, 2010) 2-ci bundesliqanın qalibi olub.

Komandanın baş məşqçisi 51 yaşlı almaniyalı mütəxəssis Torsten Liberknehtdi. O, vəzifəyə bu ilin aprelində təyin olunub. “Qırmızı iblislər” ev oyunlarını 49 min 327 yerlik Firts Valter adına stadionda keçirir.

Göründüyü kimi, “Kayzerslautern” son illərdə inkişaf edən və hər mövsüm nəticələrini yaxşılandıran komandadı. Ümid edək ki, yüksəliş Mahirin gəlişiylə sürətlənəcək və hər iki tərəf 1-ci bundesliqa hədəfinə çatacaq.

Lakin hələ həllini tapmayan məsələ də var. Çünki klub Mahirlə anlaşdığı haqda xəbəri rəsmən elan etməyib. “Kayzerslautern”in futbolçuları sabahdan etibarən bir araya gəlməli və tibbi müayinədən keçməlidi. İyunun 25-də isə komandanın təlim-məşq toplanışı start götürəcək. Qısası, Emrelinin təqdimatın vaxtının çox uzaqda olmadığına inanmaq olar.

KƏNAN BAHADIR