“Gözlənilən xəbər idi. Məncə, Mahir 2024/25 mövsümünü çox gözəl keçirdi. Hətta “Nürnberq”dəki performansını “Legiya”dakı ilk mövsümüylə müqayisə etmək olar. İnşallah, bu dəfə hər şey ardıcıllıq baxımından daha fərqli olar. “Kayzerslautern”də legionerlərə həm azarkeşlər, həm də klub tərəfindən isti yanaşma var. Onları çox sevirlər. Müqavilə müddətinin 3 il olması daha xoş xəbərdi. Deməli, hansısa klub azərbaycanlı futbolçunun potensialına inanır. Komandaya kömək edəcəyini bilir. “Kayzerslautern” ötən mövsüm də 1-ci bundesliqaya yüksəlmək uğrunda mübarizə apardı və son turlara qədər şansını qorudu. Növbəti mövsüm üçün daha yaxşı heyət qurmaq istəyirlər. Məncə, bu dəfə hədəflərinə çatmaq şansı daha çoxdu. Həm də “Kayzerslautern” ənənələri olan klubdu. İnanıram ki, Mahir Almaniyada olan azərbaycanlıların da dəstəyi sayəsində Azərbaycanı, bayrağımızı, ailəsini layiqincə təmsil edəcək, daha uğurlu çıxışını görəcəyik və komandanın daha yaxşı yerlərə gəlməsində böyük pay sahibi olacaq”.