“Real” daha bir vunderkind aldı - 17 yaşlı Mastantuono yeni ulduz sayılır
“River Pleyt”in və Argentina yığmasının 17 yaşlı yarımmüdafiəçisi Franko Mastantuono bugünlərdə “Real”a keçib. Bu keçid İspaniya klubuna 45 milyon avroya başa gəlib, müqavilə müddəti 2031-ci ilə qədərdi.
"Football-plus.az" xəbər verir ki, Mastantuono öz nəslinin ən parlaq istedadlarından biridi. O, vətənində Lamin Yamalın tempi ilə rekordları yeniləyir: Franko 17 yaşında “River Pleyt” tarixinin ən gənc debütantı və qol müəllifi oldu. Argentina yığmasında ilk dəfə 17 yaş 9 ay və 22 günlüyündə oynadı ki, bu da rekorddu.
Mastantuono “River Pleyt”də keçirdiyi iki ildə 61 oyuna çıxıb, 10 qol vurub və 7 məhsuldar ötürmə verib. Futbolçu 2024-cü ildə “The Guardian”dan yüksək qiymət alıb:
“O, solaxaya və çox sürətli futbolçudu, müstəsna driblinq bacarığı var. Franko güclü xarakterə də malikdi, yaxın 10 ildə dünyanın ən yaxşı futbolçularından biri olmaq üçün onda bütün keyfiyyətlər var. Gələcək onun əlindədi”.
Gözlənildiyi kimi, Avropanın bir çox top-klubu argentinalının “ovuna çıxmışdı” – ona iddialılar sırasında “Liverpul”, “Çelsi”, “Mançester Siti”, “Bavariya” və PSJ-nin adı çəkilirdi. Parislilər sövdələşməyə çox yaxın olsalar da, “Real” tam zamanında müdaxilə etdi və Mastantuononu ələ keçirdi. Yeri gəlmişkən, “Real”ın ödədiyi 45 milyon avro Frankonun transferini Argentina tarixində ən qiymətli etdi. Bu da daha bir rekord olsun.
Florentino Peresin rəhbərlik etdiyi klub dəst-xəttini davam etdirməkdədi – bütün dünyadan olan istedadlar üçün böyük pullar xərcləyirlər. “Real”ın bu strategiyası artıq dəfələrlə effektli olub. Məsələn, braziliyalı vinger Vinisius da 2018-ci ildə məhz 45 milyon avro müqabilində Madridə yollanıb. İndi isə bundan dörd dəfə bahadı.
Əlbəttə, “Real” heç də həmişə bu mənada uğura nail olmur. Endrik və ya Arda Gülər Madrid klubuna yaşıl meydanda hələ də istədiyini verməyib. Ancaq adı çəkilən futbolçular hələ gəncdi. Bir qədər sonra parlamaları istisna olunmur.
“Real”ın 2018-ci ildən bəri aldığı gənc oyunçular
ad alındığı qiymət indiki qiyməti
Vinisius 45* 170
Rodriqo 45 90
Endrik 35 35
Arda Gülər 20 45
Braim Dias 17 40
Federiko Valverde 5 130
* - milyon avro ilə göstərilib.
“Kral klubu”nun strategiyası ümumilikdə fasiləsiz işləyir. Mastantuono növbəti uğurlu nümunə olacaqmı? Bunu da tezliklə görəcəyik.
Franko “Real”a avqustda – yetkinlik yaşına çatandan sonra qoşulacaq. Yarımmüdafiəçi klublararası dünya çempionatına “River Pleyt”in heyətində yollanıb. Marselo Qalyardonun çalışdırdığı komandanın qrupdakı rəqibləri “Urava Red Daymonds”, “Monterrey” və “İnter”di.
Digər xəbərlər
