Bu qrupda ilk tur favoritlər üçün uğurlu alındı. “Mançester Siti”nin özündən qat-qat zəif “Vidad”la matçda xal itirməsi böyük bir fiasko olardı. Çünki “Vidad” hətta ölkəsində belə son çempionluğu 3 il öncə qazanıb.

Mərakeşlilərin heyətinin ümumi dəyəri (18 milyon avro), nəinki Holann və Rodridən, hətta Kovaçiçdən (20 milyon avro) də aşağıdı. Heyətlə “oynamağı” sevən Qvardiola meydana qeyri-adi “11-liy”i buraxmışdı. Reynders və Şerki kimi yeni transferlər ilk dəqiqələrdən oynamaq şansı qazanmışdısa, Diaş, Qvardiol, Rodri, Gündoğan, Bernardo Silva, Holann kimi ulduzlar ehtiyatda qalmışdı.

Kasablanka təmsilçisi artıq 2-ci dəqiqədə mərkəzə dəvət olundu. Foden qapıçının inamsız oyunundan sonra topu tora göndərdi. 2023-cü ildə də fərqlənməyi bacaran Foden ən azı iki fərqli KDÇ-də qol vuran ilk ingiltərəli futbolçu kimi tarixə düşdü. 2-ci qol fasilə ərəfəsində vuruldu. Foden bu dəfə hesabına məhsuldar ötürmə yazdı və Dokyu yekun nəticəni müəyyənləşdirdi. “Siti” 2-ci hissədə özünə əziyyət vermədi. Hərçənd Holannın qol vurmaq üçün dəridən-qabıqdan çıxdığı hiss olunurdu. Amma norveçli qoleador yarım saatdan artıq meydanda olsa da, fərqlənə bilmədi.

“Siti”dən fərqli “Yuventus” rəqibinə rəhm etmədi. 2023/24-də Asiya Çempionlar Liqasının qalibi olmuş “Əl-Əyn” Turin nəhəngi qarşısında pərən-pərən düşdü. Özü də, adətən, çox qol vurmayan “Yuve” bu dəfə fasiləyə qədər 4 top vurdu! Komandanın ilk yarıda 4 qol vurması faktına sonuncu dəfə 2018-ci ildə “Sassuolo” ilə qarşılaşmada rast gəlinmişdi.

Gənc türkiyəli ulduz Kənan Yıldız da qollardan birini hesabına yazdı. Konseysao ilə Kolo Muani isə dubl etdi. 5 top fərqi ilə qalib gələn “qoca sinyora” maraqlı bir göstəriciyə nail oldu. Belə ki, komanda beynəlxalq matçda sonuncu dəfə ən azı 5 top fərqli qələbəni 2003-cü ilin dekabrında qazanmışdı. Həmin vaxt “Yuve” ÇL-də “Olimpiakos”u 7:0 hesabıyla darmadağın etmişdi. Bu qrupda ilk iki pillənin “Siti” ilə “Yuve”yə qismət olacağı indidən şübhə doğurmur.

G qrupu
1-ci tur
Mançester Siti – Vidad 2:0 (2:0)
Mançester Siti (İngiltərə): Ederson, Lüis, Reys, Ake, O`Rayli, Reynders, Şerki (Holann, 59), Foden (Rodri, 60), Savinyo (Nunyeş, 90+1), Dokyu (Bobb, 59), Marmuş (İlkay Gündoğan, 68).
Vidad (Kasablanka, Mərakeş): Benabid, Mufi, Butuil, Oliveyra, Meyers (Mutaraci, 75), Mufid, Mubarik, Zemraui (Malsa, 62), Amrabat (Obenq, 61), Lorç (Əziz Ki, 84), Mailula (Rayhi, 46).
Qollar: Foden, 2 (1:0). Doku, 42 (2:0).
Vərəqələr: Mailula, 16 – sarı. Lüis, 88 – qırmızı.
Hakim: Ramon Abatti (Braziliya).
18 iyun. Filadelfiya. 37446 tamaşaçı.

Əl-Əyn – Yuventus 0:5 (0:4)
Əl-Əyn (Əbu Dəbi, BƏƏ): Patrisio, Traore, Ratnik, Rabia, Autonne (Nyanq, 68), Zabala, Kaku (Yasiç, 76), Park (Şadli, 76), Palasios (Nader, 68), Laba, Rahimi (Udoh, 90).
Yuventus (Turin, İtaliya): Di Qreqorio, Koşta, Kalulu, Savona (Qatti, 70), Kelli, Kambiaso (Vea, 46), Makkenni, K.Türam (Luis, 46), Konseysao, Kənan Yıldız (Koopmayners, 61), Kolo Muani (Vlahoviç, 70).
Qollar: Kolo Muani, 11 (0:1). Konseysao, 21 (0:2). Kənan Yıldız, 31 (0:3). Kolo Muani, 45+4 (0:4). Konseysao, 58 (0:5).
Vərəqələr: Makkenni, 5. Kambiaso, 16. Konseysao, 60. Qatti, 82. Traore, 90+3 – sarı.
Hakim: Mari Tori Penso (ABŞ).
18 iyun. Vaşinqton. 18161 tamaşaçı.

22 iyun: Yuventus – Vidad, Mançester Siti – Əl-Əyn.