“Qarabağ” dörd futbolçusu ilə yollarını ayırdı.

"Football-plus.az" xəbər verir ki, bunlar Yassin Benzya, Patrik Andrade, Marko Veşoviç və İsmayıl İbrahimlidi.

İsmayıl son iki mövsümdə “Zirə”də icarə əsasında oynayırdı. Rəşad Sadıqovun komandası millimizin yarımmüdafiəçisinin transfer hüququndan yararlanaraq heyətinə qatıb. Benzya son mövsümdə “Qarabağ” formasında çempionatda 32 oyuna çıxıb, 7 qol vurub, 6 məhsuldar ötürmə verib. Andrade 23 oyuna çıxıb, 1 qol, 2 məhsuldar ötürmə ilə yadda qalıb. Veşoviç isə çempionat oyunlarının heç yarısında iştirak etməyib - 17 oyun, 2 məhsuldar ötürmə.

Benzya komandaya gələndə karyerası bitmiş vəziyyətdə idi. “Fənərbaxça”, “Olimpiakos” kimi klublarda oynamış əlcəzairli Cica və Dyakabi ilə birgə 2023-ün qışında gəlmişdi. O üç futbolçudan ən çox fayda verən elə Benzya oldu. Düzdü, “Qarabağ” Konfrans Liqasının pley-off mərhələsində “Gent”lə oyunda penalti seriyasında Benzyanın qeyri-dəqiq toxunuşundan sonra Bakıya əliboş gəlmişdi. Amma təkcə ötən mövsüm Avropa Liqasındakı çıxışı nəyə desən, dəyərdi. Açığı, Benzya fərq yaratmırdı. Bunun da səbəbi “köhlən atlar”ın komanda şəklində ideala yaxın oynaması idi. Bu mövsüm isə qışaqədərki performansı onu ehtiyat oyunçuya çevirmişdi. Şəxsi həyatında baş verən problemlər, Kadinin o mövqe üçün transfer olunması, eləcə də maliyyə baxımından sərfəli təkliflər əlcəzairli futbolçunun Ağdam təmsilçisindən ayrılmasına səbəb oldu.

Patrik Andrade də onlarla “Qarabağ” futbolçusu kimi gedib, sonra dönənlərlərdən oldu. Birinci “Qarabağ” dönəmi çox yaxşı idi. Elə buna görə də “Partizan”a getdi. Lakin orda istədiyi rahatlığı tapa bilməyən Patrik Qurbanovun yanına qayıtdı. Geridönüş isə istənilən kimi alınmadı. “Bude/Qlimt” ilə qarşılaşmanı çıxsaq, başqa parlaq oyunu olmadı.

Marko Veşoviç isə yəqin ki, “Qarabağ” tarixinin gəlmiş-keçmiş ən yaxşı sağ cinah müdafiəçilərindən biridi. Monteneqrolunun iki problemi oldu - yaş və zədə. Əslində yaşı 33 olmasaydı, belə çox zədələnməzdi. Ən azı zədələnsə də, tez bərpa olunardı. Veşoviç bu mövsüm tam ehtiyat oyunçu statusu ilə barışdı. Nəinki Mateus Silva, sol cinah müdafiəçisi Toral Bayramov, uzun müddət topdan uzaq qalan Abbas Hüseynov belə Qurban Qurbanovun gözünə Markodan daha yaxşı göründü.

Qurban bəyin bu dörd futbolçu ilə bağlı qərarı doğrudu. Qalır digər faydasız futbolçuların göndərilməsi və “Qarabağ”ın adına yaraşan transferlər...

MÜZƏFFƏR QULUZADƏ