Abramoviç futboldan birdəfəlik getdi - o, bir daha klub almayacaq
Yəhudi əsilli rusiyalı milyarder Roman Abramoviç bugünlərdə bir daha futbol klubu almayacağını bildirib. “Çelsi”nin sabiq sahibinin dediyinə görə, bundan sonra onun idmanda iştirakı ehtiyacı olanlara yardım göstərməklə məhdudlaşacaq.
"Football-plus.az" xəbər verir ki, Abramoviç gələcək fəaliyyəti haqda Nik Pürelin “Sanksiyalar altında: “Çelsi”nin satışının pərdəarxası tarixçəsi” kitabı üçün müsahibəsində mülahizə yürüdüb. Milyarderin dediyinə görə, günlərin birində “Stemford Bric”ə tamaşaçı kimi qayıtmaq istərdi ki, klubla layiqincə vidalaşsın.
Ancaq Abramoviç bir daha komanda idarə etmək niyyətində deyil:
“Futbol klubunda peşəkar səviyyədə heç bir rol məni maraqlandırmır. Bəlkə də akademiyalar və gənclər üçün layihələrə yardım edə bilərəm. Bu təşəbbüs uğur qazanacaqsa, çətin şəraitdə olan adamlar üçün daha böyük imkanlar yaratmaq istərdim. Kluba yiyələnmək və ya onun idarə olunmasında iştirak – bütün qalan ömrümdə belə şey olmayacaq”.
Əslində Abramoviçi anlamaq asandı. 2022-ci ildə Britaniyanın hakimiyyət orqanları onu “Çelsi”dən imtinaya məcbur etdi. Halbuki 2003-cü ildə London klubunu 140 milyon funta alan Abramoviç onun bütün tarixini yenidən yazdı. “Zadəganlar” rusiyalının rəhbərliyi altında beş dəfə premyer-liqanın çempionu oldu, iki dəfə Çempionlar Liqasını, bir çox başqa ölkədaxili titulları qazandı.
2010-cu illərin ortalarından Abramoviçlə Britaniyanın hakimiyyət orqanlarının münasibətləri pisləşməyə başladı. Biznesmen son illərdə hətta İngiltərəyə baş çəkmirdi. 2022-ci ili fevralında Rusiya Ukrayna torpaqlarını işğal etmək üçün müharibəyə başlayandan sonra Böyük Britaniya Abramoviçə münasibətdə sanksiya tətbiq etdi. Belədə Abramoviç elə həmin ilin yazıda klubu amerikalı Todd Boeliyə 4,25 milyard funta satmalı oldu.
Yeri gəlmişkən, Abramoviç bu pulu da ala bilmədi – hakimiyyət orqanları ilə razılaşmaya əsasən vəsaitin bir hissəsi “Çelsi”nin xəzinəsində qaldı, 2,5 milyardı isə biznesmen humanitar məqsədlər üçün xərcləməliydi. Ancaq tərəflər bu məsələdə anlaşa bilmədilər: britaniyalılar pulun Ukraynanın xeyrinə xərclənməsi üçün israr etdi, Abramoviç isə münaqişənin gedişində əziyyət çəkən hər kəs üçün.
Hazırda Böyük Britaniya məhkəməyə hazırlaşır. Ancaq bu məqam milyarderi narahat etmir:
“Köhnə rus məsəli var: it hürər, karvan keçər. Bu durum üçün yerinə düşür. Həyatım boyunca nə etmişəmsə, adamlar həmişə gizli motivlər axtarıb. Ancaq nə edə bildimsə, etdim, adamlara kömək göstərməyə çalışdım”.
“Çelsi”ni məcburi şəkildə satandan sonra milyarderin bəzi başqa klubları ala biləcəyi haqda xəbərlər yayıldı. “Valensiya”nın, “Göztəpə”nin, Rusiyanın bəzi klublarının adı çəkildi. Ancaq heç bir sövdələşmə baş tutmadı. İndi isə belə aydın olur ki, Abramoviç bir daha futbol layihəsi ilə məşğul olmağı planlaşdırmır.
Digər xəbərlər
