İran ilə İsrail arasında yaşanan gərginlik, eləcə də hər iki ölkənin öz hava məkanlarını bağlaması bir çox sahələrdə olduğu kimi idmana da təsirini göstərib.

"Football-plus.az" xəbər verir ki, ''İnter''in iranlı forvardı Mehdi Taremi öz ölkəsini tərk edə bilmir!

Təcrübəli forvard DÇ-2026-nın seçmə mərhələsinin maçlarında iştirak etmək üçün vətəninə yollanmışdı. Taremi Klublararası Dünya Çempionatında iştirak etmək üçün İrandan ABŞ-a yollanmalı idi. Amma iyunun 14-də bəlli oldu ki, Taremi ölkəsindən çıxa bilmir. Artıq 2 gündü, İranda bütün uçuşlar qadağan edilib və bunun nə qədər davam edəcəyi bilinmir. Futbolçusunun durumundan narahat olan ''İnter'' rəhbərliyi dünən gün ərzində onunla əlaqədə oldu.

Klub rəsmiləri Taremini Tehrandan çıxara bilmək üçün bütün vasitələrə əl atsalar da, bunu reallaşdırmaq mümkün olmadı. Nikola Skiranın paylaşdığı ən son xəbərə görə Tareminin adı artıq iştirak ərizəsindən çıxarılıb və onun turnirdə iştirak etməyəcəyi dəqiqləşib.

Bu arada İran tərəfdən İsrailə atılan bombalardan biri tanınmış basketbol məşqçisi Dimitris İtudisin yaşadığı evə düşüb. İtudis hazırda Tel-Əviv ''Hapoel''ini çalışdırır.

Ancaq hadisə vaxtı o, vətəni Yunanıstanda olduğundan heç bir xəsarət almayıb. 2016 və 2019-cu illərdə ÇSKA ilə Avroliqanın qalibi olmuş 54 yaşlı mütəxəssis 2022/23-də ''Fənərbaxça''nı da çalışdırıb.