“Karvan”da baş məşqçi problemi... – Kənan Kərimovu əvəz edəcək mütəxəssisin adı açıqlandı
Məlum olduğu kimi, “Karvan”da Kənan Kərimovla bağlı həllini tapmayan məsələ var.
Belə ki, mütəxəssisin PRO kateqoriyasının olmaması baş məşqçi kimi premyer-liqaya yüksəltdiyi komandada rəsmi şəkildə eyni vəzifədə qalmasına imkan vermir. Bu səbəbdən klubun Azər Məmmədovu baş məşqçi təyin edəcəyini, Kənan Kərimovun isə onun köməkçisi olacağını yazmışdıq. Ancaq vəzifə bölgüsü yalnız rəsmi sənədlər üzərində olacaqdı. Yəni baş məşqçinin səlahiyyətləri faktiki Kənan Kərimovda qalacaqdı.
İş ondadı ki, Azər Məmmədov bir neçə gün əvvəl saytımıza açıqlamasında Yevlax təmsilçisiylə hansısa əlaqəsinin olmadığını bildirdi.
Bəs klub bu problemi necə həll edəcək? Alternativ variant düşünülübmü?
“Karvan”ın mətbuat xidmətinin rəhbəri Bəhruz Musayevin “Football-plus.az”a cavabı:
“Kənan Kərimov hələ PRO kateqoriyası almayıb. Yaxın günlərdə baş məşqçiylə bağlı ictimaiyyətə açıqlama veriləcək. Böyük ehtimalla, baş məşqçi Azər Məmmədov, əsas söz sahibi isə Kənan Kərimov olacaq. Yəni plan dəyişməyib”.
KƏNAN BAHADIR
Digər xəbərlər
