''Fənərbaxça''da bu mövsüm ümidləri doğrultmayan futbolçuların başında gələn Alan Sen-Maksimen ilə bağlı yeni transfer xəbəri yayılıb.

''Sarı-lacivərdlilər'' mövsümün əvvəlində ''Əl-Əhli''yə icarə haqqı üçün klub tarixinin rekord məbləğini - 8 milyon avro ödəyərək bu futbolçunu birillik icarəyə götürmüşdülər. Amma Sen-Maksimen o qədər zəif təsir bağışladı ki, komanda onunla hətta qışda vidalaşmaq istəyirdi. Amma onun qış transfer dönəmində ''Napoli''yə keçidi son anda baş tutmadı. İkinci dövrənin gedişində təcrübəli futbolçu bu dəfə Mourinyo ilə problem yaşamağa başladı və hətta qısa müddət oyunlardan kənarlaşdırıldı.

Düzdü, sonradan onların ulduzu barışdı və futbolçu yenidən oynamağa başladı. Ən son ''Beşiktaş''la derbidə Sen-Maksimenin adının iştirak ərizəsinə salınmaması diqqət çəkdi. Türkiyə mətbuatının iddiasına görə bu futbolçu ağrılarının olduğunu deyərək oynamaqdan imtina etdi! İndi də Sen-Maksimen müalicə olunması üçün vətəni Fransaya yollanıb. Amma iddialara görə o, Fransaya başqa səbəbə, şərəfini qorumaq arzusunda olduğu ''Marsel'' ilə danışıqlar aparmaq üçün yollanıb.

Sen-Maksimen artıq Səudiyyə Ərəbistanı və ''Əl-Əhli''yə qayıtmaq istəmir. ''Marsel''in çalışdırıcısı Roberto De Zerbi 4-3-3 sisteminə uyğun gələn, sürətli və driblinq bacarığı olan vinger transfer etmək istəyir. Sen-Maksimen bu tələbləri qarşıladığı üçün və o özü də bu kluba can atdığı bu transfer kifayət qədər real görünür. Ancaq bunun artıq ''sarı-lacivərdlilər''lə bir əlaqəsi olmayacaq. Mövsüm bitən kimi Sen-Maksimen klubdan ayrılmalı olacaq.

8 milyonluq futbolçunun bu mövsüm 31 rəsmi oyunda iştirak edərək yalnız 4 qol, 5 məhsuldar ötürmə ilə fərqləndiyini bildirək.