“Turan Tovuz” bu mövsüm elə bil bir filmin içində idi ki, başlanğıcı ümid verdi, ortası həyəcanlandırdı, sonu isə ürək ağrıtdı.

Mövsümün ilk yarısında qazanılan xallar, tribunaları coşduran oyunlar, Tovuzda yaşanan ab-hava - hər şey avrokubok xəyalını gerçəyə çevirmək üçün idi. Hətta bir ara 3-cü pillə tam real görünürdü. Amma qış fasiləsindən sonra komanda sürətlə geriləməyə başladı. Zədəli futbolçular oldu, oyunda sabitlik itdi, rəqiblərin xal itkiləri dəyərləndirilmədi. “Araz-Naxçıvan” da, “Turan Tovuz” da xal itirdi. Fərq ondadı ki, biri sona qədər mübarizə apardı, digəri isə tədricən oyundan düşdü.

Ən maraqlı və düşündürücü məqam o idi ki, camiə “Qarabağ”ın kuboku qazanacağına köklənmişdi. Planlar qurulmuşdu ki,  “Qarabağ” kuboku götürəcək, “Turan Tovuz” da 4-cü yerin verdiyi avrokubok biletini cibinə qoyacaq. Sosial mediada yürüş planları, şəhərdə təntənəli mərasim haqda danışılırdı. Azarkeşlər artıq xəyal qurmuşdu ki, “Qarabağ” kuboku qazanır, Tovuzda isə bayram başlayır. Amma nə oldu? “Sabah” bütün planları alt-üst elədi. “Turan Tovuz”un avrokubok ümidləri “Sabah”ın kubok sevinci ilə puç oldu.

Bəli, komanda bu mövsüm tərəqqi etdi, amma eyni zamanda, ciddi problemlərinin olduğu da gördü. Təntənəyə hazırlaşan tovuzlu azarkeşin indi təəssüflənməkdən və dərindən ah çəkməkdən başqa yoli yoxdu.

Görəsən, Kurban Berdıyevin əhval-ruhiyyəsi necədi? Özündə zərrəcə günah görürmü?

ƏSƏD SEYİDOV