Belə görünür ki, Florian Virtsin “Liverpul”a keçidi qarşıdakı günlərdə gerçəkləşəcək.

"Football-plus.az" xəbər verir ki, İngiltərə çempionu futbolçunun razılığını alıb və “Bayer-04”ə də 135 milyon avro ödəməyə hazırdı. Halbuki bir neçə həftə əvvəl hər kəs Leverkuzen klubunun əsas ulduzunun “Bavariya”ya keçəcəyini deyirdi. “Liverpul” Virtsin ailəsini inandırmağı bacardı. Bunun üçün tərəflər İngiltərədə görüşüb.

“Liverpul”un Virts uğrunda mübarizəyə ciddi şəkildə qoşulması haqqında ilk xəbərlər mayın ilk həftəsində yayıldı. Onda Almaniya mediası iddia edirdi ki, Florianın transfer işləri ilə məşğul olan ailə üzvləri İngiltərəyə yollanıb. Əvvəlcə hər kəs “Mançester Siti”dən şübhələnməyə başladı. Axı bu komandanın baş məşqçisi Pep Qvardiola alman yarımmüdafiəçini Kevin de Bruynenin ideal əvəzedicisi sayır və şəxsən özü Florianı məhz “Etihad”ı seçməklə bağlı dilə tuturdu.

Amma Almaniyanın məşhur nəşrlərindən “Kicker” bu versiyanı təkzib etdi:

Bir qədər sonra “The Athletic” hətta Florianın Liverpulda onun üçün ayrılacaq mənzili gözdən keçirdiyini də yazdı. Mayın sonuna doğru bu yöndə daha dəqiq informasiyalar peyda olmağa başladı.

“Bild” mayın 30-da “Liverpul”un ilk rəsmi təklif göndərdiyini yazdı. İngiltərə klubu leverkuzenlilərə 117 milyon avro, üstəlik 13-16 milyon arasında bonus təklif edir. Yəni “qırmızılar” 133 milyon avro ödəməyə hazırdı, ancaq “Bayer-04” bu transferdən 150 milyon avro götürəcəyinə ümid edir. “Liverpul” hələ ki 135 milyonu aşmaq istəmir. Tərəflərin səsləndirdiyi rəqəmlər arasında o qədər böyük fərq olmadığına görə hər kəs tezliklə bu keçidin rəsmiləşəcəyini gözləyir.

“Bayer-04” 135 milyon avro ilə razılaşsa, Virts futbol tarixinin ən bahalı üç transferi siyahısına düşəcək. Ondan irəlidə yalnız Kilian Mbappe (PSJ-yə 180 milyona keçmişdi) və Neymar (“Barselona”dan 222 milyona gedib) olacaq. Filippe Koutinyo və Usman Dembele də kataloniyalılara 135 milyona başa gəlmişdi.

Virtsin “Liverpul”a mümkün keçidi ümumilikdə 300 milyon avro (maaş, bonuslar və agent komissiyaları da nəzərə alınmaqla) həcmində dəyərləndirilir. Hazırda “Liverpul”un bu qədər pulu yoxdu. Klubun direktoru Maykl Edvards Bostona uçub ki, belə böyük xərci “Liverpul”un sahibi olan FSG şirkətinin rəhbəri Con Henri ilə razılaşdırsın.

İnsayderlərdən Fabritsio Romano, Saşa Tavolyeri və Florina Plettenberq də bu yöndə xəbərləri təsdiqləyirlər və yazırlar ki, “Liverpul” bu transferi mümkün qədər tez bitirməyə çalışır.

Bəs axı biz girişdə “Bavariya”nın da ulduza marağından bəhs etmişdik. O məsələ necə oldu? Doğrudan da, Münhen klubu uzun müddət Virts uğrunda mübarizədə favorit sayılırdı. Ancaq futbolçunun ailəsinin Londonun şimalına səfərindən sonra Almaniya mediasında yer alan yazıların tonu dəyişdi.

Əvvəlcə bütün müəlliflər münhenlilərin keçidin mümkünlüyünə inamından yazırdısa, tezliklə bu yöndə ciddi şübhələr üzə çıxmağa başladı.
Etiraf etmək lazımdı: “Bavariya” bu mübarizədən ilk növbədə maliyyə mülahizələrinə görə çəkildi. Bu klub ciddi satışı həyata keçirmədən özünə belə səxavətli davranışı rəva görə bilməz. Münhenlilər futbolçunun özünü inandırmaq və bu yolla “Bayer-04”ə təzyiq göstərmək istəyirdi, ancaq “Liverpul” araya girincə vəziyyət dəyişdi.

“Kicker” iddia edir ki, “Liverpul”un baş məşqçisi Arne Slotla söhbət Floriana daha inandırıcı görünüb, nəinki Vensan Kompaninin taktiki düşüncələri.

Belə mülahizələr də var idi ki, Virts, ümumiyyətlə, bu ya “Bayer-04”dən getmək istəməyəcək – belədə “Bavariya” 2026-cı ildə rahatca transferi bitirə bilərdi. Ancaq bu da alınmadı.

“Bild” güman edirdi ki, “Bavariya”nın sabiq prezidenti, bu prosesin içində olan Uli Höness ilə söhbət Florianı inandıra bilər. Belə çıxır ki, söhbət də nəticəsiz bitib. Axı Virts “Liverpul”u seçib və hətta “Bavariya”nı da bundan xəbərdar edib.

Ötən il Xabi Alonso ilə adı tez-tez yanaşı hallanan “Liverpul” “Bayer-04”ün oyunçularına daim maraq göstərir. Çox güman, Virts Slotun sərəncamına verilən ikinci “aspirin” olacaq. Birinci “Real”a yollanan Aleksander-Arnoldu əvəz etmək üçün alınan Ceremi Frimponqdu. O da maraqlıdı ki, Ceremi Virtsin ən yaxın dostlarından biridi. O, ulduz yarımmüdafiəçi ilə münasibətlərini belə xarakterizə edir:
Təbii ki, bu münasibətlərin də gözlənilən keçidin daha asan alınmasında rolu var. “Liverpul” həm də bu amilin sayəsində Virtslə danışıqlarda bir addım önə çıxıb, ən istedadlı almaniyalı futbolçulardan birini layihəsinin cəlbediciliyinə inandıra bilib.