Yığmamız beynəlxalq yoldaşlıq oyununda Macarıstana uduzdu - 1:2.

"Football-plus.az" xəbər verir ki, millimizin baş məşqçisi Fernando Santuş oyunsonrası mətbuat konfransında jurnalistlərin suallarını cavabladı.

- Oyuna yaxşı başlamadıq. Erkən qol vursaq da, özümüzü toparlayıb cavab verdik. Rəqibin növbəti qoluna qədər komandaların bərabərsəviyyəli çıxışını izlədik. Oyunçularım sona qədər bərabərlik qolunu vuracağına inanırdı. Bəzi futbolçularda yorğunluq var idi. Bu üzdən, əvəzetmələr etdik. Son 15 dəqiqədə üç şansı dəyərləndirə bilmədik. Futbolda bəzən bəxt də lazımdı. Hər halda, son iki oyundakı çıxışımızdan razıyam.

- Rza Cəfərov qol vurmağa çalışırdı. Bu, öz fikri idi, yoxsa baş məşqçinin qərarı idi?
- Mənim qərarım idi. Bu barədə ona tapşırıq vermişdim.

- Komandada sizi narahat edən məqamlar hansılardı?
- Bu haqda oyunçularla danışırıq. Belə məsələləri onlarla müzakirə etmək istəyirəm. Səhvlərimizin üzərində çalışdıq. Əlbəttə, hələ çatışmayan cəhətlər var. Ancaq bu dəfə daha yaxşı çıxış etdik.

- Marko Rossi millimizin əllə oyundan sonra qol vurduğunu dedi. Bəs, siz necə düşünürsüz?
- Məncə, VAR olsa da, qol sayılacaqdı. Çünki futbolçu özü qəsdən topa toxunmadı.

- Bəlkə millimizin səhvlərini media önündə etiraf edəsiz? Bu, futbolçular üçün də dərs olar. Həmişə komandadan razı qalırsız.
- Bunu heç vaxt etməmişəm və etməyəcəm. Həmçinin, həmişə komandadan razı qaldığımı deməmişəm.

- Emin Mahmudovu "6 nömrə" mövqeyində oynadırsız. Bu, onun yaradıcılıq potensialına mənfi təsir etmir?
- Emin bu gün mükəmməl oyun göstərdi. Əksinə, məncə, bu mövqedə daha yaxşı çıxış edir. Emin texnikaya malik olan futbolçudu.

- Cəlal Hüseynov oyundan sonra bildirdi ki, baş məşqçimizin əsas tələbi qol buraxmamaqdı. Qol vurmaq sonranın işidi. Heç-heçələrlə hara qədər irəliləmək olar?
- Mən belə söz deməmişəm, yalandı.

KƏNAN BAHADIR