Millimiz beynəlxalq yoldaşlıq oyunu çərçivəsində səfərdə Latviya ilə 0:0 hesablı heç-heçə edib.

"Football-plus.az" yığmamızın baş məşqçisi Fernando Santuş matçdan sonra keçirilən mətbuat konfransında jurnalistlərin suallarını cavablandırıb.

- Komanda oyuna yaxşı köklənmişdi. İlk 15-20 dəqiqədə bir az problemlər var idi. Xüsusən də topa nəzarət baxımından. Demək olar ki, yalnız bir istiqamətdə hücum qurmağa çalışdıq. Daha sonra komanda topa nəzarət etməyə başladı. İkinci hissədə topa nəzarət bizdə idi. Rəqibin qapısı önündə təhlükə yarada bildik. Rəqib isə qapımızın qarşısında təhlükə yarada bilmədi. Latviya millisi də hücum qurmağa çalışdı. Komandam yaxşı çıxış etdi. Çatışmayan yeganə şey qol epizodlarını dəyərləndirə bilməmək idi. Məşqlərdə qapıya zərbələri çox çalışırıq. Bu gün uzaqdan zərbələr çatışmadı. Hər oyunçu topla qapıya girmək istəyirdi.

- Azərbaycandan bura sadəcə topa nəzarət etməyə gəlmişdiz? Sizcə, bundan bərbad oyunumuz ola bilər?
- Əlbəttə, qələbə qazanmağa gəlmişdik. Amma o komanda ki, topa nəzarət etmir, heç vaxt qələbə qazana bilməz. Təhlükəli epizodlar yaratdıq. Qapıya zərbə vurmuruq.

- Mahir Emreli iki metr məsafədən qol vura bilmir. Səbəb nədi?
- Bu da futbolun bir hissəsidi. Mahir bundan öncəki çətin epizodları qola çevirə bilirdi, lakin bu gün alınmadı. Nəriman Axundzadənin də epizodları var idi. Oyunu ümumi təhlil etsək, komanda pis çıxış etmədi. Bəzi məqamlar var ki, daha yaxşısını etməliyik.

- Elvin Bədəlovun durumu necədi?
- Ayağında problem var. Həkimlər baxandan sonra dəqiq məlumat verəcək.