Volkan Dəmirəl Mourinyonun köməkçisi olacaqmı?
“Fənərbaxça” üçün böyük ümidlərlə başlayan mövsüm kabus kimi bitdi. Artıq ciddi dəyişikliklər zamanıdı.
"Football-plus.az" xəbər verir ki, bu dəyişikliyə ötən cümə günü start verildi.
İki təcrübəli futbolçu – Edin Ceko və Duşan Tadiçlə yollar ayrıldı. Normal şərtlərdə bu cür ulduzlar son matçdan öncə meydana çıxmalı və onlara alqış sədaları altında xatirə hədiyyəsi təqdim olunmalıdı. Amma bu futbolçuların, eləcə də başqan Əli Koç və vitse-prezident Acun Ilıcalı kimi nüfuzlu şəxslərin iştirakı ilə keçirilən vida mərasimi klubun bazasında baş tutdu. Şəkillərdə arxa fonda qaz plitəsinin, onun üstündə qab-qacağın olması sosial şəbəkələrdə böyük müzakirələrə səbəb oldu. Adolf Hitler həyatının son günlərini bunkerdə keçirdiyi və Yeva Braun ilə bunkerdə ailə qurduğu kimi “Fənər”in ulduzları da qaranlıq bunkeri xatırladan bir məkanda vidalaşmağa üstünlük verdilər!
Deyilənə görə onlar fanatların etirazından çəkindikləri üçün bu yolu seçdilər. Ötən il Leonardo Bonuççi stadionda vidalaşarkən ciddi fit və etiraz sədaları eşidilmişdi. Ceko ilə Tadiçin vida mərasimi 2019-cu uldə Volkan Dəmirəlin rəhbərlikdən üzr istəyərək əfv olunduqdan sonra keçirdiyi ilk mətbuat konfransını xatırlatdı. Həmin vaxt Volkan portatif bir masanın başında əyləşmişdi. Onun başının üzərində isə divara köhnə bir televizor vurulmuşdu.
Yeri gəlmişkən, Dəmirəl bu aralar çox gündəmdədi. Məlum olduğu kimi “Fənər”in Joze Mourinyonu qovmağa gücü çatmasa da, onun köməkçilərini qovmağa gücü çatıb. Məhz Dəmirəlin portuqalıyalının köməkçilərindən birinə çevriləcəyi iddia edilmi.di. 43 yaşlı mütəxəssis son açıqlamasında həm bu məsələyə, həm də gündəmdəki mövzulara toxunub. O, “Fənər”in sabiq üzvlərinin bir araya gəlməsi haqda da danışıb. Belə ki, “sarı-lacivərdlilər”in sabiq yerli ulduzları - Volkan Dəmirəl, Semih Şəntürk, Canər Ərkin, Tuncay Şanlı, Səlcuk Şahin və Gökhan Gönül bu günlərdə bir restoranda görüşərək söhbət ediblər. Onların birlikdə çəkdirdiyi şəkil marağa və müzakirələrə səbəb olub.
Sözü verək Volkana:
“Doğru zaman gəldikdə “Fənərbaxça”da işləyəcəm. Doğru zaman nə vaxtdı? Allah bilir (gülür). Bu saatdan sonra mən heç kimin köməkçisi olmaq istəmirəm! Nələr olacağını birlikdə görəcəyik. Sabiq komanda yoldaşları olaraq görüşmək qərarına gəldik. Təbii ki, komandanın durumunu da müzakirə etdik. Amma əsasən köhnə xatirələrimizlə bölüşdük. Pley-offun finalını izləmək üçün Sakaryaya getmişdim. Orda Tuncay Şanlı ilə qarşılaşdıq. Qərara gəldik ki, bir yerə yığışaq. Eyni məhəllədəki dostları da çağırdıq. İşim olduğu üçün həmin yeməyə gec qatılmalı oldum. Tadiçlə Cekonun vida mərasiminin mənim 2019-cu ildə keçirdiyim mətbuat konfransına bənzəməsi barədə şərhlər oxudum. Mənim durumum bir qədər fərqli idi. Çünki həmin gün yağış yağırdı. Qapalı bir məkanda keçirmək istədik. Qısa müddətdə qərar verməli idik və oranı seçdik. Mənə qarşı vəfasızlıq edildiyini düşünmürəm. Amma digərlərinin əvəzinə fikir bildirə bilmərəm. Bu suala həmin şəxslər özləri cavab verməlidi. Mənim ümumiyyətlə “Fənərbaxça” ilə bağlı heç bir incikliyim yoxdu. Bu klub ilə birlikdə həm üzülürük, həm də sevinirik. Bizim üçün “Fənərbaxça”nın olduğu hər yerdə xoşbəxtlik var”.
Digər xəbərlər
