Yeni mövsüm üçün heyətini formalaşdırmağa başlayan "Qarabağ"ın Yassin Benzya ilə yolları ayırdığını yazmışdıq. Ağdam təmsilçisi daha bir futbolçu ilə bağlı mövqeyini qətiləşdirib.

"Football-plus.az" xəbər verir ki, baş məşqçi Qurban Qurbanovun 2025/26 "futbol ili"ndə sərəncamında olmayacaq növbəti oyunçu Şahruddin Məhəmmədəliyevdi.

"Köhlən atlar" qapıçıyla bu ayın sonunda müddəti başa çatacaq müqaviləni yeniləmək istəmir. Artıq "əlcək sahibi" bu barədə məlumatlandırılıb. Qolkiper artıq Türkiyə və Rusiyanın əsas çempionatlarında iştirak edən klublardan aldığı təklifləri dəyərləndirməyə başlayıb.

"Qarabağ" tezliklə Şahruddinlə yolları ayırdığı haqda xəbəri ictimaiyyətə açıqlayacaq.

Maraq üçün qeyd edək ki, "köhlən atlar"ın heyətində Mateus Koxalski, Fabian Buntiç, Amin Ramazanov və Sadiq Məmmədzadə kimi qapıçılar var.

Xatırladaq ki, Şahruddin 2016-23-cü illərdə "Qarabağ"ın şərəfini qoruyub. 2023/24 mövsümünü "Adana Dəmirspor"da keçirən qolkiper ötən ilin iyulunda qayıdıb və birillik anlaşmaya qol çəkib.

O, başa çatan mövsümdə 11 premyer-liqa matçında meydana çıxıb. Bunların 5-də 9 qol buraxan futbolçu 6-da "çərçivə"ni toxunulmaz saxlayıb.

KƏNAN BAHADIR