“Qarabağ”ın mövsümlərarası fasilədə heyətində dəyişikliklər edəcəyindən xəbərdarsız.

“Football-plus.az”a daxil olan məlumata görə, yayda komandanı tərk edəcək futbolçulardan birinin adına aydınlıq gəlib. Bu, Patrik Andradedi. Klub onunla mövsümün sonunda müddəti başa çatacaq müqaviləni yeniləməyəcək.

“Köhlən atlar”ın baş məşqçisi Qurban Qurbanov onun göstərdiyi xidmətdən məmnun deyil. Odu ki, mütəxəssis orta sahəni daha bacarıqlı futbolçuyla gücləndirmək istəyir. Bu barədə oyunçunun özünə məlumat verilib və sərfəli təklifləri dəyərləndirməsi yolunda hansısa maneənin qalmadığı bildirilib.

Xatırladaq ki, kabo-verdeli yarımmüdafiəçi “Qarabağ”ın heyətində bütün turnirlər üzrə 36 oyunda meydana çıxıb və 3 qol, 2 məhsuldar ötürmə ilə yadda qalıb.

O, 2023-cü ilin yayında Ağdam təmsilçisiylə “2+1” illik müqaviləyə qol çəkmişdi.

KƏNAN BAHADIR