''Beşiktaş'' aparıcı oyunçularından biri olan Əl Musratini əldən buraxmağa yaxındı. Liviyalı yarımmüdafiəçi Səudiyyə Ərəbistanına yollanmaq üzrədi.

"Football-plus.az" xəbər verir ki, ''Əl-Fateh'' İstanbul nəhənginə rəsmi təklif irəli sürüb. Əl Musratiyə təklif gəldiyini bir neçə gün öncə ''Beşiktaş''da prezidentliyə namizəd olarkən Hüseyin Yücəl də açıqlamışdı. Tərəflər artıq anlaşmaq üzrədilər. Səudiyyə Ərəbistanı çempionatında sonuncu pillədə qərarlaşan və Əl Musratini icarəyə götürmək istəyən ''Əl Fateh'' qarşı tərəfə maraqlı şərtlər təklif edib.

Belə ki, komanda elitada yerini qorusa, mövsümün sonunda ''Qartal''a 10 milyon avro verərək təcrübəli futbolçunu daimi əsasda heyətinə qatacaq. Komanda elitada qalmasa, Əl Musrati ''ağ-qaralar''a geri dönəcək. Digər detallara gəlincə, ərəblər 1 milyon avro icarə haqqı təklif ediblər. Bundan başqa müqavilədə futbolçu ilə bağlı xüsusi şərtlər yer alacaq. Həmin şərtlər qarşılansa, ''Əl-Fateh'' elitada qalıb-qalmamağından asılı olmayaraq 7 milyon avro (üstəlik 2 milyon avro da bonus) ödəyərək Əl Musratini transfer edəcək.

Bu futbolçu ''Beşiktaş''a ötən mövsümün qış fasiləsində 11 milyon avroya ''Braqa''dan gəlib. Klub tarixinin ən bahalı futbolçusu statusunda olmasına baxmayaraq performansı yetərli olmayan Əl Musrati bu mövsüm 19 rəsmi oyuna çıxaraq 2 qol vurub.

ƏLİ