Millətlər Liqasının sayca 4-cü mövsümünə yekun vuruldu.

"Football-plus.az" xəbər verir ki, bürünc medallar uğrunda oyunda Fransa Almaniyanı 2 cavabsız qolla məğlub etdi.

Həlledici oyunda isə İspaniya ilə Portuqaliya üz-üzə gəldi. İspaniya favorit sayılmasına və iki dəfə hesabda önə keçməsinə baxmayaraq fanatlarını sevindirə bilmədi. İspanların heyətində Martin Subimendinin ilk qoluna portuqaliyalılarda Nuno Mendeş cavab verdisə, Mikel Oyarsabalın qoluna Kriştiano Ronaldo cavab verdi. O, yığmada 138-ci, peşəkar karyerasında 938-ci qolunu vurdu.

Maraq üçün Lionel Messinin Argentina yığmasında 112 qol vurduğunu bildirək. Ronaldonun 88-ci dəqiqədə zədələnərək əvəzləndiyi oyunda Portuqaliya penaltilər seriyasında 5:3 üstün oldu. İspanların heyətində Alvaro Moratanın penaltini qaçırması həlledici oldu. Bununla da ''avropalı braziliyalılar'' tarixlərində 3-cü titulu qazandılar.

Bu titulların hər biri Kriştianonun oynadığı dönəmə təsadüf edir. Komanda daha öncə ML-i 2019-da da qazanmışdısa, 2016-da Avropa Çempionatının qalibi olmuşdu. Ronaldo 2021-dən bu yana birinci, ümumilikdə isə karyerasında 33-cü titulunu qazandı. 4 il öncə o, ''Yuventus''la İtaliya kubokunun qalibi olmuşdu.

Yığma ilə qazandığı 3 tituldan başqa o, ''Sportinq''də 1, ''Mançester Yunayted''də 9, ''Real''da 15 və ''Yuventus''da 5 titul qazanıb.