Ronaldonun gözü önündə qolu Ronaldo kimi qeyd etdi!
Millətlər Liqasının 1/4 finalının ilk oyunları arasında əsas sürpriz Kopenhagendə qeydə alındı.
''Football-plus.az'' xəbər verir ki, Portuqaliya səfərdə oynamasına baxmayaraq favorit hesab olunurdu. Danimarka son 4 qarşılaşmada qələbəyə həsrət qalmışdı. Portuqaliya isə AÇ-2024-dən bu yana heç kimə uduzmamışdı. Amma Kriştiano Ronaldo, Bruno Fernandeş, Rafael Leao kimi ulduzların start heyətində meydana çıxmasına baxmayaraq Portuqaliya qələbə bir yana, heç qol da vura bilmədi.
Görüşdə yeganə qolu Rasmus Höylunn vurdu. İkinci hissənin gedişində meydana daxil olan ''Mançester Yunayted''in forvardı 79-cu dəqiqədə komandasına qələbə qazandıran qolu vurdu. 22 yaşlı futbolçu yığmanın heyətində təxminən ilyarımlıq fasilədən sonra ilk dəfə qol sevinci yaşadı.
Ən maraqlıdı isə odu ki, Höylunn Ronaldonun gözü önündə qol sevincini məhz onun kimi qeyd etdi! Bu futbolçu çoxdan Kriştianonun heyranıdı. O, oyundan sonra da bu faktı gizlətmədi:
''Mənim üçün sadəcə möhtəşəm bir gecə alındı. Hər mənada bu matç karyeramın unudulmazları arasına düşdü. Kumirimə qarşı oynadım və qələbə qolunu vurdum. Mənim üçün bundan gözəl ssenari yazıla bilməzdi''.
Portuqaliya yığmasında ardıcıl 22 il forma geyən ilk futbolçu kimi tarixə düşməsi Ronaldo üçün kiçik bir təsəlli oldu. Kriştiano yığma komandada hələ 2003-cü ildə debüt edib.
ƏLİ
Digər xəbərlər
