Martın 28-də milli komandaların oyunları üçün nəzərdə tutulan həftəyə yekun vuruldu. Çərşənbə axşamı Santyaqo del Estero və Köln şəhərlərində keçirilən yoldaşlıq görüşlərində maraqlı faktlar qeydə alındı.

"Football-plus.az" xəbər verir ki, sonuncu dünya çempionu Argentina yığmasının Kürasaonu, belə desək, top atəşinə tutacağı gözlənilirdi. Lionel Skaloninn komandası zəif rəqibin qapısından 7 cavabsız top keçirdi. Santyaqo del Esterodakı matç Messi üçün əlamətdar oldu. Panama ilə əvvəlki oyunda (2:0) karyerasında 800-cü qolunu vuran hücumçu milli formada 99-cu qoluna sevinmişdi. 35 yaşlı Lionel bu dəfə het-trik etməklə yığmadakı qollarının sayını 102-yə çatdırdı. Lionel milli komandada 100 qol həddinə çatan 3-cü futbolçu oldu. O, bu göstəriciyə əsasən portuqaliyalı Kriştiano Ronaldo (122) ilə İran yığmasının sabiq hücumçusu Əli Daeidən (109) geri qalır. Messinin milli formada 174 oyun keçirdiyini də bildirək.

Kölndəki matçı maraqla gözləməyə dəyərdi. AÇ-2024-ün seçmə turnirindən azad olan yerli Almaniya yığması Belçikanı qonaq etdi. Qeyd edək ki, bundestim bu rəqibi ilə keçirdiyi 11 rəsmi oyunun hamısında (!) qalib gəlmişdi. Yığmamızın seçmə qrupdakı rəqibi yeni baş məşqçi Domeniko Tedeskonun başçılığı altında ikinci matçda da qələbə qazandı. Martın 24-də səfərdə İsveçin qapısından 3 cavabsız top belçikalılar almanları da üç dəfə meydanın mərkəzinə dəvət etdilər. Matça fırtına kimi başlayan qonaqlar artıq 9-cu dəqiqədə ikitopluq üstünlük yaxalamışdılar. Ferreyra-Karrasko ilə Lukakuya məhsuldar ötürmələri De Bruyne verdi. Almanları çalışdıran Hans-Diter Flik 32-ci dəqiqədə heyətdə iki dəyişiklik etməli oldu. Tədricən üstünlüyü ələ alan bundestim Füllkruqun penaltidən vurduğu qolla fasilə ərəfəsində fərqi minimuma endirdi. İkinci hissəyə hücumlarla başlayan meydan sahibləri belçikalıları qapısına sıxışdırmağa nail oldu. Lakin əks-hücumların birində qonaqların 3-cü qolunu vuran De Bruyne matça damğa vurdu. Almaniyanın gücü qalan vaxtda yalnız bir qolla təsəlli tapmağa çatdı. Beləliklə, Belçika yoldaşlıq görüşündə də olsa, qalib gəlməklə bundestimlə bağlı sindroma son qoydu.