Ruben Amorim Qarnaçonu oyundaşlarının gözü önündə danladı
Faciəvi mövsümdən sonra “Mançester Yunayted”də ab-hava korlanıb.
"Football-plus.az" xəbər verir ki, iş hətta ciddi münaqişəyə qədər irəliləyib: komandanın baş məşqçisi Ruben Amrorim oyunçuların gözü önündə Alexandro Qarnaçoya qapını göstərib və klub rəhbərliyi də bu ideyanı dəstəkləyib.
“Daily Mail”in yaydığı xəbərə görə, “Yunayted”in Direktorlar Şurasının mayın 23-də keçirilən iclasında Amorim də iştirak edib. Məhz orda Qarnaçonun satılması ideyası qaldırılıb. Çox güman, portuqaliyalı məşqçinin argentinalı futbolçu ilə vidalaşmaqla bağlı qərarı önündə “yaşıl işıq yandırılıb”.
“The Athletic”in yaydığı xəbərə görə, artıq ertəsi gün Amorim vingeri özünə yeni iş yeri axtarmaqla bağlı xəbərdar edib. Özü də yetərincə sərt formadı. Bütün komandanın gözü önündə ona belə deyib:
“Özünə klub tapmaq üçün dua etməyin yaxşı olar”.
20 yaşlı yarımmüdafiəçi bir neçə gün əvvəl Avropa Liqasının “Tottenhem”lə final oyununda cəmi 20 dəqiqə oynamasından narazılıq etmişdi: “Mövsüm bizim üçün zibil kimi alındı, indi də finalda uduzduq. Liqada heç kimə qalib gələ bilmirik. İndiyə qədər Avropa Liqasının hər mərhələsində oynamışam, final gəlib çatanda isə cəmi 20 dəqiqə meydanda oldum. Yayın ləzzətini çıxarmağa çalışacam, sonra baxaq görək necə olur”.
Alexandronun qardaşı və agenti Roberto isə sosial şəbəkələrdə məsələyə daha emosional şəkildə reaksiya verib: “Başqalarından daha artıq dərəcədə çalışmaq, hər mərhələdə yardım etmək, son iki finalda iki qol vurmaq... Sadəcə, ona görə ki, meydanda 19 dəqiqə keçirəsən və avtobusun altına atılasan. Oho, hahahahaha”.
Amorim də danışılanlara reaksiya verib: “İndi belə danışmaq asandı. “Atletik”lə yarımfinal oyununun ilk yarısında kim real qol vəziyyətindən yararlanmadı? Qarnaço”.
Məhz final oyununda sonra Alexandronun “Yunayted”dən gedəcəyi ilə bağlı növbəti xəbərlər peyda olmağa başladı. Və bu da təəccüblü deyil. Ona görə ki, argentinalı heç də ilk dəfə qalmaqalın mərkəzində dayanmır.Hələ ötən ilin dekabrında Qarnaçonun adı qalmaqalda hallanırdı: həmin vaxt onu MY-nin start heyətini kənara sızdırmaqda suçlayırdılar. Bundan başqa, müxtəlif vaxtlarda argentinalı sosial şəbəkələrdə yersiz layklar üzündən də yaxalanıb. Məsələn, Alexandro Erik ten Haqın tənqid olunduğu və Lisandro Martinesin səhvinin göstərildiyi paylaşımların altında “ürək” işarəsi qoyub. PAOK ilə Avropa Liqasının oyunu ərəfəsində avtoqraf paylayarkən tez-tez ötürmə vermək və topa ilk toxunuş üzərində çalışmaqla bağlı məsləhət eşidib və cavabında həmin azarkeşə meydana çıxaraq oynamağı təklif edib.
Qışda Qarnaçonun “Napoli”yə mümkün satışı haqda çox danışırdılar: medianın yzdığına inansaq, İtaliya klubu 40 milyon avro ödəməyə hazır idi, ingilislər isə ən azı 60, bəzən də 60 milyon istəyirdilər. Neapola köçlə bağlı söhbətlər səngiyən kimi Alexandronun “Çelsi”dən Kristofer Nkunku ilə dəyiş-düyüşü haqda ideya ortaya atıldı. “Tottenhem” də onunla maraqlanırdı, ancaq heç kimlə anlaşmaq mümkün olmadı.
Personası ətrafındakı neqativ fona baxmayaraq, məhz argentinalı komandanın premyer-liqada və Avropa Liqasında məhsuldarlığa görə 3-cü oyunçusudu. Qarnaço AL çərçivəsində 15 oyunun hamısına çıxıb (10-da start heyətində), beşində məhsuldar hərəkətlə yadda qalıb: “Bude/Qlimt”in qapısına qol vurub, FKSB, “Real Sosyedad” (iki dəfə) və “Lion” ilə oyunlarda məhsuldar ötürmə verib.
Premyer-liqada isə yalnız üç sahə oyunçusu – Dioqo Dalot, Bruno Fernandeş və Nussair Mazraui ondan daha çox meydanda olub. Çempionatda 6 qol və 2 məhsuldar ötürmə ilə komanda yoldaşlarından yalnız Fernandeşlə Amad Diallodan geri qalır.
Ümumiyyətlə, argentinalı vinger son mövsümdə 5 turnir çərçivəsində keçirdiyi 58 oyunda 11 qol vurub və 10 məhsuldar ötürmə verib. “Transfermarkt”da onun dəyəri 45 milyon avro göstərilir.
Digər xəbərlər
